Ang Paboritong Songbok ni Irina

DILI pa dugay, si Irina, usa ka nuybe-anyos nga batang babaye nga taga-Sofia, Bulgaria, nabawtismohan ingong usa sa mga Saksi ni Jehova. Hilig siyang moawit ug malingaw ilabina sa mga alawiton sa librong Mag-awit ug mga Pagdayeg Kang Jehova. Busa gihimong tumong ni Irina nga makamemorya sa pipila ka alawiton matag bulan.

Usa sa paboritong mga tun-anan sa eskuylahan ni Irina mao ang musika. Busa ang iyang maestra sa musika naglibog kon nganong mibalibad si Irina sa tanyag nga mokanta uban sa choir sa eskuylahan. Nganong mibalibad si Irina? Iyang naamgohan nga kadaghanan sa musika nga kinahanglan niyang awiton naghimaya sa nasodnong mga bayani ug mga selebrasyon nga pagano ang sinugdanan. Ang pipila ka awit nag-awhag pa gani ug rebelyon ug kapintasan aron sa pagpasiugda sa nasodnong mga mithi. Ang magtutudlo dili makasabot sa baroganan ni Irina bahin niining butanga. Si Irina misulat na lang sa iyang magtutudlo nga nagpahayag sa iyang relihiyosong mga kombiksiyon​—apan wala kini molampos.

Nakahunahuna ang amahan ni Irina. Gihatagan niya ang magtutudlo ug usa ka kopya sa librong Mag-awit ug mga Pagdayeg Kang Jehova, nga naundan sa mga awit nga gustong awiton ni Irina. Pipila ka adlaw sa ulahi, ang magtutudlo nagpatawag kang Irina ngadto sa lawak sa musika. Gihangyo niya si Irina sa pag-awit sa pipila niya ka paboritong mga awit gikan sa libro​—atubangan sa iyang mga klasmet​—samtang ang magtutudlo nagduyog kaniya sa piyano. Gidangtag kapin sa usa ka oras ang pag-awit! Ang magtutudlo kinahanglang moangkon nga ang paboritong songbok ni Irina adunay maanindot nga mga tono.