Palamdaga ang Inyong Kahayag!

SA KATAPOSAN ang panahon miabot alang sa tigulang nga lalaki nga makakita sa gisaad nga Mesiyas! Pinaagi sa balaang pinadayag si Simeon nasayod nga “siya dili makakita sa kamatayon sa dili pa niya makita ang Kristo ni Jehova.” (Lucas 2:26) Apan pagkakulbahinam kadto sa dihang si Simeon misulod sa templo ug si Maria ug Jose nagbutang sa batang si Jesus sa iyang mga bukton! Siya midayeg sa Diyos, nga nag-ingon: “Karon, Soberanong Ginoo, ikaw nagapalakawng gawasnon sa imong ulipon diha sa kalinaw . . . tungod kay nakita na sa akong mga mata ang imong galamiton sa pagluwas . . . usa ka kahayag alang sa pagkuha sa tabil sa kanasoran ug usa ka himaya alang sa imong katawhan nga Israel.”​—Lucas 227-32; itandi ang Isaias 421-6.

Si Jesus, sukad sa pagbawtismo kaniya sa edad nga 30 hangtod sa iyang pagkamatay, napamatud-ang “kahayag” sa kalibotan. Sa unsang mga paagi? Siya nagbanaag ug espirituwal nga kahayag pinaagi sa pagsangyaw mahitungod sa Gingharian sa Diyos ug sa Iyang mga katuyoan. Giyagyag usab niya ang bakak relihiyosong mga pagtulon-an ug tin-awng nagpaila sa mga buhat nga iya sa kangitngit. (Mateo 15:3-9; Galacia 5:19-21) Busa, si Jesus tukmang nakaingon: “Ako mao ang kahayag sa kalibotan.”​—Juan 8:12.

Si Jesus namatay sa tuig 33 K.P. Napalong ba niadtong panahona ang kahayag? Wala gayod! Samtang dinhi pa sa yuta, giingnan ni Jesus ang iyang mga tinun-an: “Palamdaga ang inyong kahayag atubangan sa mga tawo.” (Mateo 516) Busa, human mamatay si Jesus ang iyang mga sumusunod padayong nagpalamdag sa kahayag.

Sa pagsundog kang Jesus, ang mga Kristohanon karong adlawa nagsumbalik-silaw sa kahayag ni Jehova pinaagi sa pagpakig-ambit sa buluhatong pagsangyaw. Sila ‘padayong naglakaw ingon nga mga anak sa kahayag,’ nga nagpamatuod sa ilang mga kaugalingon nga nagasidlak nga mga panig-ingnan sa Kristohanong pagkinabuhi.​—Efeso 5:8.