Usa ka Okasyon nga Dili Nimo Angay Sayloan

“Ang matag maayong gasa ug matag hingpit nga hatag” nagagikan sa Diyos, sa atong langitnong Amahan. (Santiago 1:17) Ang labing dakong gasa nga nahatag sa Diyos ngadto sa makasasalang katawhan mao ang tagana alang sa ilang pagpasig-uli pinaagi sa iyang bugtong Anak, si Jesu-Kristo. Ang kamatayon ni Jesus ingong atong Manunubos nagpaposible sa kinabuhing walay kataposan diha sa usa ka paraisong yuta. Diha sa Lucas 22:19, kita gisugo sa paghandom sa iyang kamatayon.

Ang mga Saksi ni Jehova mainitong nagdapit kanimo sa pagpakigbahin kanila sa pagsunod sa sugo ni Jesus. Kining tinuig nga pagsaulog pagahimoon human sa pagsalop sa adlaw sa petsa nga motakdo sa Nisan 14 sa lunar nga kalendaryo sa Bibliya, nga maoy sa Martes, Abril 2, 1996. Butangig timaan kining petsaha aron dili ka makalimot niini. Ang mga Saksi ni Jehova sa imong dapit makasulti kanimo sa eksaktong dapit nga tigomanan ug oras.