“Ayaw Silag Papahawaa!”

“KON usa sa mga Saksi ni Jehova, o bisan duha, motimbre sa imong pultahan, ayaw silag papahawaa!” mitambag ang Corriere della Sera. Ang mantalaan naghisgot sa usa ka kahimtang nga nahitabo sa Treviso, amihanang Italya, diin usa ka negosyante ang nameligrong mawad-ag kapin sa usa ka milyong lira (kapin sa $600, T.B.) tungod sa pagpapahawa sa duha ka Saksi nga miduaw kaniya.

Sumala sa mantalaan, duha ka Saksi ang nagpailaila sa ilang kaugalingon sa tawo sa mga pulong: “Karong adlawa maoy maayong adlaw alang kanimo. Kami mga Saksi ni Jehova, ug kami adunay bililhong butang nga ihatag kanimo.” Niana, ang dili-mahigalaong negosyante misira sa pultahan, nga wala magtugot kanila sa pagtapos.

Kon ang tawo naminaw pa, mahibaloan unta niya nga ang mga Saksi miadto sa iyang balay aron sa pag-uli sa iyang pitaka, nga ilang napalgan sa usa ka lingkoranan sa parke. Busa ang mga Saksi walay laing mahimo kondili ang pagdala sa pitaka uban sa mga sulod niini ngadto sa kinadul-ang estasyonan sa polis. Sa misunod nga adlaw, ang polis nag-uli niana sa tag-iya.

“Kon lain pa ang nahimutang sa dapit sa duha ka pakyas [mga Saksi],” matod sa Il Gazzettino di Treviso, “lagmit siya . . . magtipig sa dakong kantidad nga salapi diha sa pitaka. Apan dili ang mga Saksi ni Jehova, kinsa kinahanglang bug-os nga matinud-anon.”

Unsay nagpalihok sa mga Saksi ni Jehova sa pagkahimong “bug-os nga matinud-anon”? Mao ang ilang gugma sa Diyos ug sa silingan, sumala sa mga pagtulon-an ni Jesu-Kristo. (Mateo 22:37-39) Mao usab kanay hinungdan kon nganong ang mga Saksi ni Jehova mamalaybalay aron sa pagmantala sa maayong balita mahitungod sa kahibulongang “bag-ong yuta” nga gisaad ni Jehova nga Diyos. Ang maong mensahe sa paglaom labaw pa ug bili kay sa bisan unsang materyal nga kabtangan!​—2 Pedro 3:13.