Usa ka Katumanan sa Tagna sa Bibliya

DIHA sa Imperial War Museum sa London, Inglaterra, mao ang usa ka talagsaong relo ug usa ka elektronikong digital counter. Samtang motuyok ang relo, ang counter mohagtik sa kada 3.31 segundos. Sa matag hagtik laing numero ang madugang sa bug-os nga gidaghanon. Ang matag hagtik, ang matag numero, nagahawas sa usa ka lalaki, babaye, o bata nga namatay ingong resulta sa gubat niining sigloha.

Ang counter nagsugod sa pag-ihap niini niadtong Hunyo 1989 ug gidahom nga makompleto ang ihap sa tungang gabii sa bisperas sa tuig 2000. Nianang panahona unya ang numero diha sa counter moabot na ug usa ka gatos ka milyon​—ang gibanabanang gidaghanon sa nalangkit sa gubat nga mga kamatayon sa tibuok ika-20ng siglo.

Halos 2,000 ka tuig kanhi, gitagna ni Jesu-Kristo ang panahon nga pagatiman-an sa ‘nasod motindog batok nasod ug gingharian batok gingharian.’ Sa ingon, ang mga Saksi ni Jehova dugay nang nagsangyaw nga ang malaglagong mga gubat niining sigloha, uban sa daghang linog, mga kamatay, kakulang sa pagkaon, ug ubang mga kaugmaran, sa tingob nagpamatuod nga kita nagkinabuhi na sa “kataposang mga adlaw”​—ang yugto sa panahon nga mosunod sa pagkaentrono ni Kristo ingong Hari sa langit sa tuig 1914.​—Lucas 21:10, 11; 2 Timoteo 3:1.

Nagagamit sa Bibliya ingong awtoridad niini, Ang Bantayanang Torre nagpahayag sa maayong balita nga ang Gingharian sa Diyos sa dili madugay maglaglag sa mga malupigon ug maghimo sa yuta nga usa ka paraiso. Ug komosta ang bahin sa palaaboton sa panaggubat? Ang Bibliya nag-ingon: “Umari, kamo nga katawhan, tan-awa ang mga buhat ni Jehova, kon sa unsang paagi gibuhat niya ang katingalahang mga hitabo sa yuta. Nagapahunong siya sa mga gubat hangtod sa kinatumyan sa yuta. Iyang balion ang pana ug bunggoon ang bangkaw; sa kalayo sunogon niya ang mga karo [sa gubat].”​—Salmo 46:8, 9.

[Picture Credit Line sa panid 32]

Relo: Pinaagig Kortesiya sa Imperial War Museum