“Kitang Tanan Sakop sa Usa ra ka Pamilya”

SA KATUIGANG bag-o pa ang relihiyosong pagpihigpihig ug rasismo mikuyanap sa tibuok yuta. Ang etnikong mga kalainan nakahaling sa mga pagpatay, pagpaantos, ug ubang makauulawng mga kapintasan. Sumala sa usa ka taho sa Amnesty International, tungod sa mga paglapas sa mga katungod sa tawo kapig 23 milyong tawo sa tibuok kalibotan napugos pagbiya sa ilang mga balay sa 1994.

Sa Rwanda lamang, mga 500,000 ka tawo ang gipatay ug kapig 2,000,000 pa ang nahimong mga kagiw human mosilaob ang kapintasan tali sa Tutsi ug sa Hutu. “Ang mga Saksi ni Jehova ang gilutos ilabina,” mitaho ang Belgianhong mantalaang Le Soir, “tungod sa ilang pagdumili sa paggamit ug mga armas.” Ang mga Saksi ni Jehova dili moapil sa armadong mga away. Bisan pa niana, ginatos kanila ang namatay tungod sa kabangisan. Kini magpahinumdom kanato sa mga pulong ni Jesus ngadto sa iyang mga tinun-an: “Tungod kay kamo dili man bahin sa kalibotan, . . . ang kalibotan nagadumot kaninyo.”​—Juan 15:19.

Usa ka pamilyang Saksi​—si Eugène Ntabana, iyang asawa, ug duha ka anak​—nagpuyo sa kaulohan, ang Kigali. Sa dihang nagpatin-aw sa Kristohanong neyutralidad ngadto sa iyang mga silingan, si Eugène kasagarang naghisgot bahin sa bombil, usa ka mokatay nga tanom nga malamboon sa init nga mga klima.​—Mateo 22:21.

“Dinhi sa Kigali,” si Eugène nagpatin-aw, “ang bombil magpatunghag pula, rosas, ug usahay puting mga bulak. Bisan pa niana, silang tanan sakop sa usa ra ka pamilya. Sama ra sa mga tawo. Bisan pag kita tingali bahin sa lainlaing mga rasa, kolor sa panit, o etnikong kagikan, kitang tanan sakop sa usa ra ka pamilya, ang pamilya sa tawo.”

Ikasubo, bisan pa sa ilang makigdaitong kinaiya ug neyutral nga baroganan, ang pamilyang Ntabana gipatay sa giuhaw-sa-dugo nga panon sa mga manggugubot. Hinuon, sila namatay nga matinumanon. Makapaneguro kita nga tumanon ni Jehova nga Diyos ang iyang saad ngadto kanila, ug sila pagabanhawon aron magapanunod sa usa ka kalibotan diin ang pagpihigpihig mawala na. (Buhat 24:15) Unya, ang pamilyang Ntabana, kauban sa uban pa, “makakaplag sa ilang tumang kahimuot sa kadagaya sa pakigdait.”​—Salmo 37:11.