Kinsa ang Mahimong mga Ebanghelisador?

DIHA sa usa ka tigom sa Konsilyo sa mga Iglesya sa Kalibotan mga 40 ka tuig kanhi, ang mga membro giawhag nga “modasdas diha sa espiritu sa ebanghelismo” ug tudloan ang ilang panon “sa pag-ebanghelyo.” Lima ka tuig sa ulahi si John A. O’Brien, usa ka Katolikong klerigo, misulat bahin sa panginahanglan sa pagpasulod ug bag-ong mga tinun-an “pinaagi sa pag-adto kanila” ug dili lamang “pinaagi sa paglingkod sa atong mga balay.” Ug niadtong Enero 1994, si Papa Juan Paulo II miingon nga “dili kini ang panahon nga igakaulaw ang Ebanghelyo, kini ang panahon nga isangyaw kini gikan sa mga atop.”

Dayag kining popanahong mga pag-awhag sa mga ebanghelisador wala patalinghogi. Usa ka artikulo sa mantalaang Illawarra Mercury sa Australia miingon: “Ang prominenteng mga Katoliko sa South Coast dili andam nga mosagop sa samag-Saksi ni Jehova nga paagi sa ilang pagtuo.” Usa ka tawo ang miingon nga ang ebanghelismo yanong “dili bahin sa panghunahuna sa Katoliko.” Ang lain nangatarongan: “Maayo alang sa Simbahan ang pagpalambo sa kaugalingon niini, apan dili pinaagi sa pagtuktok sa pultahan. Tingali mas maayo nga ipaagi sa mga tunghaan o sa pagpadalag mga sulat.” Bisan ang dekano sa lokal nga katedral wala makaseguro kon sa unsang paagi sabton ang mga pulong sa papa. “Atong madasig ang mga tawo nga batasanon ang Ebanghelyo nga ilang nahibaloan pinaagi sa ilang kaugalingong mga kinabuhi,” siya miingon. “Kon kana nagpasabot ug pagpanuktok sa pultahan dili ako buot mokomento.” Maayong pagkasuma kini sa pangunang ulohan sa balita: “Wala patalinghogi sa mga Katoliko ang awhag sa Papa sa pagsangyaw.”

Bisag napakyas ang Kakristiyanohan sa pag-ebanghelyo, kapin sa lima ka milyong Saksi ni Jehova nagatuman sa sugo ni Jesus nga “panglakaw . . . ug paghimog mga tinun-an sa katawhan sa tanang kanasoran.” (Mateo 28:​19, 20; itandi ang Buhat 5:42.) Ang ilang pultahan-ug-pultahang pagsangyaw ginahimo na karon sa kapin sa 230 ka nasod. Ang mensahe nga ilang ginadala maoy hinungdanon, nga nagpasiugda sa kahibulongang mga saad sa Bibliya alang sa umaabot. Nganong dili makig-estorya kanila sa sunod panahon nga sila moduaw?