Kinsa ang Nagakontrolar?

“KINSA ang nagamando sa kalibotan?” Kon adunay mangutana kanimo nianang pangutanaha, unsay imong tubag? Ang kadaghanang relihiyosong mga tawo tingali motubag nga “ang Diyos” o “si Jesus.” Ang usa ka artikulo nga makita diha sa The Freeport News, usa ka mantalaan sa Bahamas, mitubag nga pipila lamang ang nagdahom.

“Ako nakakitag usa ka tract sa akong ganghaan,” sugod sa magsusulat sa artikulo. “Sa naandan ako dili mobasa sa basahon nga biyaan diha sa akong ganghaan, apan niining higayona mihukom ako sa pagbasa niana. Ang ulohan misukna sa pangutana, ‘Kinsa Gayod ang Nagamando sa Kalibotan?’” Pinaagi sa pagbasa sa pinasukad-sa-Bibliya nga tract, kini nga babaye nakakat-on nga ang magmamando niining kalibotana dili ang Diyos ni si Jesus kondili si Satanas nga Yawa.​—Juan 12:​31; 14:​30; 16:​11; 1 Juan 5:19.

“Hunahunaa ang way-kasingkasing nga paghingapin sa makalilisang nga kapintasan,” ang tract nagpatin-aw. “Ang mga tawo migamit ug mga gas chamber, mga kampo konsentrasyon, mga flamethrower, mga bombang napalm, ug laing mangtas nga mga paagi sa pagsakit ug pagpatay sa usag usa nga walay kaluoy. . . . Unsang mga gahom ang nagtukmod sa mga tawo sa maong dulumtanang mga buhat o nagmaniobra kanila ngadto sa mga kahimtang diin sila mobating napugos sa pagbuhat ug mga kapintasan? Ikaw ba nakahunahuna kon kaha adunay daotan, dili makita nga gahom nga nagaimpluwensiya sa katawhan sa paghimo sa maong mga buhat sa kapintasan?” Makapatingala ba nga ang Bibliya nagtawag kang Satanas “ang diyos niini nga sistema sa mga butang”?​—2 Corinto 4:4.

Makapalipay, ang panahon haduol na sa dihang si Satanas ug ang iyang mga demonyo mawala na. “Ang kalibotan nagataliwan maingon man ang tinguha niini, apan siya nga nagabuhat sa kabubut-on sa Diyos magapabilin hangtod sa hangtod.” (1 Juan 2:17) Oo, ang Bibliya nagasaad nga kadtong magabuhat sa kabubut-on sa Diyos adunay paglaom nga mabuhing walay kataposan diha sa usa ka matarong bag-ong kalibotan. (Salmo 37:​9-​11; 2 Pedro 3:​13; Pinadayag 21:​3, 4) Pagkadakong kahupayan unya nga mawala na ang daotang impluwensiya ni Satanas ug sa iyang mga demonyo!

Human sumaryoha ang mga kaundan niining gamayng tract, ang magsusulat sa artikulo sa The Freeport News mihinapos: “Ako nalipay gayod nga gibasa ko ang tract . . . tungod kay ako mabalak-on usab bahin sa kahimtang sa kalibotan, ug kon kinsa ang nagakontrolar.”