Nganong Daotan Kaayo Kining Panahona?
SA DIHANG molingkod ka sa pagbasag mantalaan o sa pagtan-aw ug balita sa TV o mamati sa usa ka sibya sa balita sa radyo, nagdahom ka ug pipila ka daotang balita, dili ba? Ikaw lagmit dili matingala nga masayod nga ang nagpadayong gubat ginasangka gihapon, nga ang mapintas nga krimen kaylap gihapon, o nga ang kagutmanan nagatiti gihapon sa kusog sa nagakaugmad nga nasod.
Kon ikaw nagpuyo nga layo niining mga hitaboa, ikaw lagmit dili mobati kanunay ug sobrang kabalaka sa maong mga taho. Kon hunahunaon, kinsay makaako sa pagkaluoy alang sa tanan niadtong nag-antos nga katawhan? Bisan pa niana, lisod kaayo nga magpabiling dili-matandog kon kita atubangon sa paagi nga niana ang pag-antos nagaapektar sa mga indibiduwal. Sa laing pagkasulti, samtang usa ka butang ang pagbasa bahin sa usa ka gubat ug magpalandong sa gidaghanon sa mga nangamatay, laing butang ang pagbasa bahin sa usa ka gamayng bata nga si Adnan, usa ka nuybe anyos nga batang lalaki nga taga-Bosnia kansang inahan namatay sa usa ka bomba nga miguba sa ilang balay. Ang amahan ni Adnan namatay kay giluthang sa usa ka esnayper mga bulan lamang sa ulahi samtang sila duyog nga naglakaw diha sa dalan. Ang iyang igsoong babaye nagkadugo hangtod namatay atubangan sa iyang mga mata pipila lamang ka semana sa ulahi, biktima sa bala sa usa ka kanyon nga mibuto diha sa tugkaran sa tunghaan. Ang mga doktor nga nagtambal kang Adnan tungod sa epekto sa nahitabo nakakaplag nga ang bata naminhod, nawad-an sa tanang pagbati—bisan ang kamausisaon. Ang mga kahadlok ug kalit nga pagdumdom sa mga hitabo nagsakit sa mga oras nga siya nagmata; ang mga urom nagtugaw sa iyang pagkatulog. Si Adnan usa gayod ka tinuod nga persona. Siya usa ka nag-antos nga bata; kita matandog gayod sa pagkaluoy kaniya.
Tinuod usab kini sa ubang mga balatian sa kalibotan. Usa ka butang ang pagkabasag kagutmanan; maoy laing butang ang pagkakitag usa ka hulagway sa singko-anyos nga batang babaye nga dako ang tiyan ug niwang ang mga bukton ug mga tiil, usa ka lugos-mabuhing biktima sa kagutom. Usa ka butang ang pagkabasag mga estadistika sa krimen; maoy laing butang ang pagkadungog sa usa ka edarang biyuda nga gibukbok ug maayo, gikawatan, ug gilugos. Usa ka butang ang pagkabasa bahin sa pag-us-os sa pamilya; maoy laing butang ang pagkahibalo nga tinuyong gipagutman ug mapintasong giabuso sa usa ka inahan ang iyang kaugalingong anak.
Masakit ang pagkabasa bahin nianang mga butanga. Apan pagkasakit ilabina kon usa niining tibuok-yutang mga hampak direktang nagaapektar kanato! Sa dihang ikaw personal nga nag-antos sa pagkadaotan, ang tibuok yutang kahimtang nga gipakita pinaagi sa mga balita sa kalibotan mahimong mapiogon. Makahahadlok ang pag-atubang sa kamatuoran nga ang pag-antos gumikan sa krimen, gubat, gutom, ug balatian nag-uswag sa gidak-on nga wala-hitupngi sa tawhanong kasaysayan. Ang mga epekto sa pagpakiglabot sa kamatuoran niining ika-20ng siglo mahimong grabe gayod—kalibog, kahadlok, ug depresyon maoy kasagaran.
Ang mga tawo sa daghang relihiyon nagapangitag mga tubag sa maong nagasamok nga mga pangutana sama sa, Nganong daotan kaayo ang mga butang? Asa nagapaingon ang katawhan?
Ikasubo, ang mga relihiyon karong adlawa wala kaayoy gitanyag nga makapatagbawng mga tubag. Sa dihang una nimong nakita ang pangutana sa hapin niining magasina, ikaw tingali misanong nga may pagduhaduha—usa ka masabtang pagsanong. Ang mga relihiyong pundamentalista sagad naningkamot sa pagpatin-aw sa mga butang nga yanong wala sa Bibliya—ang mismong adlaw ug oras sa pagkalaglag niining kalibotana. (Tan-awa ang Mateo 24:36.) Gipalabi sa mga magpapatik niining magasina nga ang Bibliya mismo ang magpatin-aw. Ikaw tingali mahibulong nga makakat-on nga ang paghisgot sa Bibliya bahin sa kataposang mga adlaw maoy tugob sa kamatuoran ug makataronganon. Ug labaw pa ang ginahimo sa Bibliya kay sa pagpatin-aw lamang kon nganong daotan kaayo ang mga butang. Kini nagatagana usab ug paglaom alang sa umaabot, usa nga tinuod makapahupay. Gidapit ka namo nga tagdon ang mosunod nga mga artikulo aron makita kon sa unsang paagi mahimo kana.
[Picture Credit Line sa panid 3]
Jobard/Sipa Press