Usa ka 403-ka-Tuig nga Kaminyoon Nagkaproblema
SA Sweden, ang Simbahan ug Estado nagpahimulos ug suod nga relasyon sa kapin sa 400 ka tuig. Karon ang kaminyoon tali sa relihiyon ug kagamhanan nagakahuyang.
Ang Lutheranismo naestablisar ingong relihiyon sa Estado niadtong 1593, ug ang tanang Sweko kinahanglan nga bawtismadong mga membro. Katuigan sa ulahi, panahon sa mga katuigang 1850, ang kausaban gihimo. Dili na kinahanglang bawtismohan pa ang mga Sweko; apan, giisip gihapon silang mga membro sa Lutheranong Simbahan. Busa, sila kinahanglang mobayad ug 1 porsiyento sa ilang gibuhisang kita aron suportahan ang simbahan ug sa pagbayad sa pipila ka sibil nga mga serbisyo nga gihimo sa simbahan. Laing kausaban ang nahitabo karong bag-o pa lamang. Sugod niadtong 1952, ang mga Sweko makabiya gikan sa simbahan sa legal nga paagi ug busa mapagawas gikan sa pagbayad ug dakong bahin sa buhis sa simbahan.
Sa dili pa dugayng katuigan ang Lutheranong Simbahan padayong nawad-an ug kontrol sa Sweden. Dili kini kapugngan, sanglit 10 porsiyento sa mga molupyo sa Sweden maoy dili-Lutheranong mga langyaw, lakip na ang mga Hudiyo, Katoliko, ug mga Muslim. Busa, sa sinugdanan sa 1996, 86 porsiyento lamang sa mga Sweko ang nasakop sa Lutheranong Simbahan, ug ang gidaghanon padayon pang nag-us-os.
Ang nagtubong kawalay-pagtagad nagpuwersa sa kal-ang tali sa Simbahan ug sa Estado. Gikapahayag na nga ang hari dili na kinahanglang usa ka Lutherano, ug ang kabataan nga matawo sa Lutheranong ginikanan dili awtomatikong isipon nga mga membro sa Lutheranong Simbahan sa Estado. Dugang pa, sumala sa The Dallas Morning News, sa tuig 2000, ang “lokal nga mga parokya ug ang estado kinahanglang magsusi ug magbahinbahin sa tuman-ka-dakong kantidad sa propiedad. Kinahanglang pakubsan sa simbahan ang $1.68 ka bilyon nga tinuig nga badyet niini, nga kadaghanan niana gikolekta pinaagig mga buhis.” Sa pagkatapos sa siglo, ang simbahan magtudlo ug kaugalingong mga obispo niini.
Samtang ang kawalay-pagtagad ug pag-us-os sa pagkamembro naghampak sa Kakristiyanohan, ang mga Saksi ni Jehova sa Sweden padayong nagalambo. Ang 1997 Yearbook of Jehovah’s Witnesses nagtaho nga adunay 24,487 ka magmamantala sa Gingharian sa Diyos sa maong yuta, ug duolan sa 10 porsiyento ang nagasangyaw ingong bug-os panahong payunir nga mga ministro. Daghan niini ang nangab-ot alang sa mas dakong mga pribilehiyo sa pag-alagad. Pananglitan, panahon sa 1995 nga distritong mga kombensiyon sa mga Saksi ni Jehova, 20 ka magtiayon ang mitunol ug mga aplikasyon alang sa misyonaryong pagbansay sa Watchtower Bible School of Gilead. Nianang panahona, may mga 75 ka graduwadong Sweko sa nangaging mga klase nga gipadala sa misyonaryong pag-alagad sa lainlaing mga bahin sa kalibotan. Sa walay duhaduha, ang ilang maayong panig-ingnan ug makapadasig nga mga sulat ug mga duaw may makapasibot nga epekto niadtong karon namalandong niining dakong pribilehiyo.
Busa, samtang ang minilyon sa Kakristiyanohan nag-antos sa pagkanawad-ag kadasig, ang mga Saksi ni Jehova “misinggit sa kalipay tungod sa maayong kahimtang sa kasingkasing.”—Isaias 65:13, 14.
[Mapa sa panid 30]
Sweden