Mga Pangutana Gikan sa mga Magbabasa
Ikaingon ba nga ang di pa dugayng gibag-ong pagsabot sa pulong “kaliwatan” sa Mateo 24:34 nagtugot sa ideya nga ang kataposan sa sistema sa mga butang madugay pa?
Dili gayod kana tinuod. Sa kasukwahi, ang di pa dugayng napauswag nga pagsabot niining butanga angayng magtabang kanato nga magpadayon sa pagpaabot sa kataposan. Sa unsang paagi?
Aw, sumala sa gipatin-aw sa Ang Bantayanang Torre sa Nobyembre 1, 1995, si Jesus nagpadapat sa mga pulong “kining kaliwatana” ngadto sa nagkadungang daotang katawhan. (Mateo 11:7, 16-19; 12:39, 45; 17:14-17; Buhat 2:5, 6, 14, 40) Dili kana kahubitan sa usa ka tinong gitas-on sa panahon nga magsugod sa usa ka tinong petsa.
Sa pagkatinuod, ang “Mga Pangutana Gikan sa mga Magbabasa” sa mao gihapong isyu sa Ang Bantayanang Torre nagtumong sa pagtagad diha sa duha ka yawing mga punto: “Ang usa ka kaliwatan sa katawhan dili mahimong lantawon ingong yugto sa panahon nga may tinong gidaghanon sa mga tuig” ug, “Ang katawhan sa usa ka kaliwatan nagkinabuhi sa usa ka medyo mubo nga yugto.”
Subsob natong gigamit ang “kaliwatan” niining paagiha. Pananglitan, moingon tingali kita nga, ‘Ang mga sundalo sa kaliwatan ni Napoléon walay kasayoran bahin sa mga ayroplano ug mga bomba atomika.’ Nagtumong ba lamang kita sa mga sundalo nga natawo sa sama gayong tuig nga nabuhi si Napoléon? Nagtumong ba lamang kita niadtong Pranses nga mga sundalo nga namatay sa wala pa mamatay si Napoléon? Siyempre wala; ni kita pinaagi sa maong paggamit sa “kaliwatan” misulay sa pag-establisar ug tinong gidaghanon sa mga tuig. Hinunoa, nagtumong kita sa usa ka medyo mubo nga yugto, dili gatosan ka tuig gikan sa panahon ni Napoléon ngadto sa umaabot.
Susama kini sa atong pagsabot sa kon unsay giingon ni Jesus diha sa iyang tagna nga gihatag didto sa Bukid sa mga Olibo. Ang katumanan sa lainlaing mga bahin sa maong tagna nagpamatuod nga ang kataposan niining sistemaha haduol na. (Mateo 24:32, 33) Hinumdomi nga sumala sa Pinadayag 12:9, 10, sa pagkatukod sa langitnong Gingharian sa Diyos niadtong 1914, si Satanas gitambog sa kasilinganan sa yuta. Ang Pinadayag midugang nga si Satanas karon adunay dakong kapungot. Ngano? Tungod kay nasayod siya nga “siya may mubo nga yugto sa panahon.”—Pinadayag 12:12.
Busa tukma nga Ang Bantayanang Torre sa Nobyembre 1 adunay sub-ulohan nga “Padayong Magbantay!” Ang mosunod nga parapo haom nga nag-ingon: “Dili kinahanglang atong masayran ang eksaktong paniempo sa mga panghitabo. Hinunoa, ang atong bug-os nga pagtagad kinahanglang anaa sa pagkamabinantayon, pag-ugmad sa lig-ong pagtuo, ug padayong pagkapuliki diha sa pag-alagad kang Jehova—dili diha sa pagkalkulo sa usa ka petsa.” Unya gikutlo niana ang mga pulong ni Jesus: “Padayon sa pagtan-aw, padayon sa pagtukaw, kay wala kamo mahibalo kon kanus-a ang tinudlong panahon. Apan ang akong ginaingon kaninyo akong ginaingon sa tanan, Padayong magbantay.”—Marcos 13:33, 37.