Pagpas-an sa Luwan sa Pagkabatan-on

NIINING “mga panahong lisod sagubangon,” ginaatubang sa mga batan-on ang bug-at nga mga pagpig-ot. (2 Timoteo 3:1) Adlaw-adlaw silang ginaatake sa propaganda nga nagdasig sa imoralidad, panabako, ug ubang mga porma sa makadaot nga panggawi. Kadtong nanagsunod sa mga sukdanan sa Bibliya mahimong gibiaybiay tungod sa pagdumili nga mopasignunot sa panon, ug ang pipila ka Kristohanon tingali mobating sayon ra ang pagkompromiso.

Sa hinapos sa ikapitong siglo W.K.P., si Jeremias misulat: “Maayo alang sa usa ka tawo nga magapas-an siya sa luwan sa iyang pagkabatan-on.” (Lamentaciones 3:27) Unsay iyang gipasabot? Nga ang pagkakat-on sa pag-atubang sa mga pagsulay samtang batan-on makatabang sa pag-andam sa usa nga masagubang ang mga hagit sa pagkahamtong. Ang mga kalisdanan, bisag dili makapahimuot, dili malikayan sa mga batan-ong Kristohanon ug mga hamtong. (2 Timoteo 3:12) Apan ang mga kaayohan sa pagkamatinumanon labaw pa kaayo kay sa bisan unsang temporaryong kahupayan nga ikahatag sa pagkompromiso.

Kon ikaw usa ka batan-on, atubanga sa kalig-on ang mga pagsulay sa pagtuo. Sa dihang tentalon sa pag-apil sa sayop nga panggawi, ayaw pagkompromiso. Bisan tuod sa makadiyot lisod ang pagbuhat niana, sa ngadtongadto, gamay na lamang ang imong mga kabalaka. Misaad si Jesus: “Isangon ang akong yugo diha kaninyo . . . , ug makakaplag kamog kahayahay alang sa inyong mga kalag. Kay maluloton ang akong yugo ug gaan ang akong luwan.”—Mateo 11:​29, 30.

Dawata ang hagit sa pagkinabuhi uyon sa mga prinsipyo sa Bibliya. Ang pagbuhat sa ingon maghatag kanimo sa labing maayong paagi sa kinabuhi karon ug usa ka seguradong paglaom sa umaabot. Sama sa ginaingon sa Bibliya, “ang kalibotan nagataliwan maingon man ang tinguha niini, apan siya nga nagabuhat sa kabubut-on sa Diyos magapabilin hangtod sa hangtod.”​—1 Juan 2:17.