‘Magpaulipon sa Agalon, si Kristo’
SA TIBUOK kasaysayan, minilyong tawo ang milahutay sa palas-anon sa pagkaulipon. Pananglitan, libolibo ka tuig kanhi, ang mga Israelinhon hilabihang nag-antos sa mga kamot sa Ehiptohanong mga magdudumala. Sama sa giingon sa Bibliya, sila “nagbutang ug mga kapatas ibabaw sa mga Israelinhon sa pagpapas-an kanila sa mabug-at nga mga luwan,” ilabina sa pagtukod ug mga tisa.—Exodo 1:11, The Jerusalem Bible.
Sa daghang nasod karong adlawa, ang mga tawo mahimong dili magpaulipon sa literal nga diwa, apan daghan ang kinahanglang magtrabaho sa daghang oras nga pinugos—usahay sa dili maayong mga kahimtang. Sila ubos sa mabug-at nga luwan nga tingali atong tawgong pagkaulipon sa ekonomiya.
Apan, adunay usa ka matang sa pagkaulipon nga dili mabug-at. Giawhag ni apostol Pablo ang kaubang mga magtutuo: “Magpaulipon kamo sa Agalon, si Kristo.” (Colosas 3:24) Kadtong mopili nga mahimong mga ulipon ni Kristo makakaplag ug kahupayan gikan sa ilang mabug-at nga mga luwan. Si Jesus mismo nag-ingon: “Umari kanako, kamong tanan nga nagabudlay ug nabug-atan, ug ako magapalagsik kaninyo. Isangon ang akong yugo diha kaninyo ug pagkat-on gikan kanako, kay ako malumog-buot ug mapaubsanon sa kasingkasing, ug makakaplag kamog kahayahay alang sa inyong mga kalag. Kay maluloton ang akong yugo ug gaan ang akong luwan.”—Mateo 11:28-30.
Ang pagdawat sa yugo ni Kristo wala magpahigawas kang bisan kinsa sa pagtagana sa materyal nga paagi sa iyang pamilya. (1 Timoteo 5:8) Kini, hinunoa, nagtanyag ug kagawasan sa daghang kalambigitan sa materyalistikong mga pangagpas. Imbes himoong pangunang tumong sa ilang kinabuhi ang materyal nga kaharuhay, ang mga Kristohanon nakakaplag ug pagkatagbaw sa pangunang mga kinahanglanon.—1 Timoteo 6:6-10; itandi ang 1 Corinto 7:31.
Ang mga Kristohanon nakakaplag usab ug kahupayan sa pagtuman sa ilang responsabilidad sa pagsangyaw sa “maayong balita” sa Gingharian sa Diyos. (Mateo 24:14) Kini mohatag ug tinuod nga kalipay ug katagbawan!
Angay kitang magmapasalamaton nga kita mahimong ‘magpaulipon sa Agalon, si Kristo’!
[Picture Credit Line sa panid 32]
Pictorial Archive (Near Eastern History) Est.