Sila Mibarog nga Malig-on Taliwala sa Paglutos sa Nazi

ANG walay-kahadlok nga integridad sa mga Saksi ni Jehova sa Nazi nga Alemanya dayag kaayo nga lahi kon itandi sa baroganan nga gipili sa mga simbahan sa Kakristiyanohan. Kini gipahayag sa propesor sa kasaysayan nga si John Weiss sa iyang basahong Ideology of Death. Siya nagsulat:

“Niadtong 1934 ang Ebanghelikal nga simbahan miinsistir nga ang mga Nazi angayng ‘abiabihon sa mga Luterano,’ ug nagpasalamat sa ‘Ginoong Diyos’ sa paghatag sa mga Aleman ug usa ka ‘relihiyoso ug kasaligan nga supremong magmamando.’ . . . Usa ka Protestanteng obispo misulat sa iyang kaparian, ‘[si Hitler] gipadala kanato sa Diyos.’” Si Weiss nagpadayon: “Ang Aleman nga Metodistang simbahan . . . miuyon kang Obispo Dibelius nga si Hitler nagluwas sa Alemanya gikan sa nagsingabot nga Bolshevic nga rebolusyon, nga nagdalag kalinaw ug kalig-on . . . Ang simbahang Mormon miawhag sa iyang mga sakop nga ang pagpakigbatok kang Hitler usa ka paglapas sa balaod sa Mormon.” Ug siya nagdugang: “Ang mga Katoliko gisultihan nga usa ka sagradong katungdanan ang pagtuman sa bag-ong estado, usa ka katungdanan nga wala bakwia bisan pagkahuman nga ang mga kalisang nga gihimo sa silangan nasayran sa kaparian.”

Apan unsa man ang mahitungod sa mga Saksi ni Jehova? Si Propesor Weiss nagpatin-aw nga “ingong usa ka grupo, ang mga Saksi ni Jehova lamang ang misukwahi sa mga Nazi.” Linibo kanila ang gibilanggo, nagpadayon si Propesor Weiss, “apan si bisan kinsang Saksi nga gibanlod sa kampo konsentrasyon mahimo untang mahigawas pinaagi lamang sa pagpirma ug dokumento ingong pagsalikway sa iyang relihiyon.”

Bahin sa integridad sa mga Saksi ni Jehova, si Propesor Weiss nagkomento: “Ang ilang panig-ingnan nagbatbat sa talagsaong determinasyon ug bayanihong gahom nga nabatonan sa sayong Kristiyanidad sa wala pa kini matukod ingong institusyon ug ang kalambigitan niini sa katilingban wala pa mopukgo sa pangandoy nga magkinabuhing may integridad. Sumala sa gisulat sa usa ka Protestanteng pastor mahitungod kanila, ‘Dili ang iladong mga simbahan, apan kining gipasipalahan ug gibiaybiay nga [mga Saksi ni Jehova] ang unang mibarog batok sa kapungot [ni Hitler], ug kinsa dunay igong kaisog nga mosukol sa mga pagsulay aron ikompromiso ang ilang pinasikad-sa-Bibliya nga mga tanlag.’”