Kawalay-Tulog sa Kagabhion nga Mapuslanon

BISAN ang mga hari may mga kagabhiong walay tulog. Ang gamhanang magmamando sa Persia sa ikalimang siglo W.K.P., si Ahasuero, nakasinati sa usa niini. Tingali mibating iyang napasagdan ang pipila ka buluhaton, iyang gipabasa ang harianong mga talaan. Iyang nasayran nga ang usa ka matinumanong alagad, si Mardokeo, nakapakgang sa usa ka planong pagpatay apan wala magantihi. Determinado si Ahasuero sa pagtul-id niining maong kasaypanan dihadiha. Ang mapuslanong mga epekto sa iyang mga lihok diha sa katawhan sa Diyos nagpakita nga gituyo sa Diyos nga dili makatulog ang hari. —Ester 6:​1-​10.

Ang kongregasyon sa mga Saksi ni Jehova sa Habagatang Aprika sa lungsod sa kabaybayonan sa Hermanus may katarongan sa paghinumdom niining bahina sa Bibliya. Naanad na sila sa pagtigom diha sa inabangang tigomanan. Sa daghang katuigan naningkamot sila sa pagpalit ug propiedad aron tukoran ug kaugalingon nilang Kingdom Hall. Ngadtongadto, sa 1991, usa ka nindot kaayong luna ang gihanyag sa Konseho sa Lungsod.

Apan, ang pipila misupak sa pagbaligya niining maong luna ngadto sa mga Saksi ni Jehova. Human malangan ug pipila ka bulan, gipahibalo ang kongregasyon nga ang tulo ka tuig nga moratorium, o legal nga yugto sa pagkalangan, gipadapat sa pagbaligya sa propiedad ngadto sa mga simbahan, ug ang paghanyag sa yuta gisibog. Sa Mayo 1993 misulat pag-usab ang kongregasyon, nga naghangyo sa konseho nga konsiderahon pag-usab ang ilang desisyon. Nakadawat silag usa ka tudling pulong nga sulat isip balos, nga nag-ingon nga ang moratorium may epekto pa gihapon.

Sa Oktubre nianang tuiga, usa sa mga konsehal sa lungsod ang may kagabhiong walay tulog. Gipalabay niya ang oras sa pagpamakli sa miaging mga nahisgotan sa konseho sa pagtino kon duna bay mga butang nga nagkinahanglag pagtagad. Ang gisulat sa mga Saksi nga naghangyo sa konseho sa pagkonsiderar pag-usab sa ilang desisyon nakadani sa iyang pagtagad. Busa siya nakahukom sa paglakip niana sa mga butang hilisgotan sa ilang sunod nga miting. Buot niyang ipasiugda nga ang mga Saksi ni Jehova nakaaplay na sa yuta una pa ang moratorium gipadapat sa propiedad alang sa mga simbahan.

Sa lakat sa panahon ang kongregasyon gipahatan sa samang propiedad nga orihinal nga gitanyag kanila niadtong 1991! Diha kini sa pangunang dalan, nga daling maabot sa mga membro sa kongregasyon ug mga interesado. Gitukod nila ang nindot nga Kingdom Hall, nga gidedikar kang Jehova niadtong Oktubre 5, 1996.

Bisag nasubo ang kongregasyon sa kahasol sa konsehal sa kagabhiong walay tulog, lagmit mahupayan siya sa kamatuoran nga dihay higayon nga bisan si Haring Ahasuero may kagabhiong walay tulog. Ug ang resulta sa maong mga kahimtang mapuslanon. Ang kongregasyon sa Hermanus mapasalamaton gayod nga nakabaton sa ilang kaugalingong Kingdom Hall, usa ka sentro sa putling pagsimba ug teokratikanhong pagbansay niining iladong lungsod sa kabaybayonan.​—Hebreohanon 10:​24, 25.