Hilom Nilang Ginadayeg ang Ilang Maglalalang

SA KINAIYANHON kahibudnganan ang mga pagsalop sa adlaw. Apan ang pagsud-ong sa adlaw nga nagasalop ilabina luyo niining bukid sa Apuan Alps sa Tuscany, Italya, tinuod gayong talagsaon.

Gilantaw gikan sa halayo, ang adlaw daw mahulog ngadto sa bukid inay modaus-os luyo niana. Ngano? Sanglit ang tayuktok sa bukid adunay kinaiyanhong arko nga maorag gisilsil kini gikan sa bukid. Sa pagkatinuod, kining habog nga lawis nakaangkon sa ngalan niini nga, Monte Forato​—ang Gisilsil nga Bukid. Tungod sa pagtuyok sa yuta palibot sa adlaw, sa duha lamang ka higayon matag tuig nga kadtong magalantaw latas sa arko makakita sa adlaw nga maorag mahulog ngadto sa Monte Forato.

Sama sa ubang mga bahin sa kalalangan, ang walay kinabuhing kalangitan nagadayeg sa ilang Maglalalang. Sa unsang paagi? Sa samang paagi nga ang matahom nga dibuho hayan magadayeg sa dibuhista nga nagpatungha niini. Sa baylo, ang langitnong mga butang nagasulti bahin sa gahom, kaalam, ug kahalangdon ni Jehova. Ingon sa pagpahayag niana sa salmista, “ang kalangitan nagapahayag sa himaya sa Diyos; ug sa buhat sa iyang mga kamot ang hawan nagasulti.” (Salmo 19:1; 69:34) Sanglit ang adlaw ug ubang walay-kinabuhing mga butang nagadayeg sa ilang Maglalalang, unsa pa kaha kita!​—Salmo 148:​1, 3, 12, 13.