Usa ka Buhat nga “Makapatahod Gayod”

SI apostol Pedro nagpahimangno sa iyang kaubang mga Kristohanon: “Padayong-hupti ang inyong panggawi nga maayo taliwala sa mga nasod, aron nga, sa butang nga sila nagapamulong batok kaninyo ingong mga mamumuhat ug daotan, sila ingong resulta sa inyong maayong mga buhat nga niini sila mga saksing-nakakita magahimaya sa Diyos.” (1 Pedro 2:12) Sulod sa daghang tuig ang mga Saksi ni Jehova sa Italya publikong nagpasundayag sa maong maayong pamatasan. Sa diwa sa instruksiyon ni Jesus nga “iwali gikan sa mga atop,” ilang gihimo ang ilang Kristohanong kalihokan sa dayag, nga makita kaayo sa publiko. (Mateo 10:​27; Juan 18:20) Busa, sa dihang usa ka abogado ug usa ka pari sa Italya mipatik ug mga akusasyon nga ang mga Saksi ni Jehova maoy “usa ka mini-relihiyoso nga sekta” ug naglakip kanila uban sa “sekretong mga grupo nga naglaang sa mga tawo,” ang mga Saksi mihukom sa pagpasakag sumbong tungod sa makapaulaw nga mga pulong.

Sa unang paghusay, ang korte nanghinapos nga ang abogado ug ang pari walay gilapas nga balaod. Apan, sa Hulyo 17, 1997, ang Venice Court of Appeals nagbalit-ad sa desisyon sa unang korte, nga nakakaplag sa mga sinumbong nga sad-an. Ang Court of Appeals miingon: “Ang napatik nga mga artikulo nga gikuwestiyon naundan sa mga ekspresyon ug mga pulong nga makapadaot gayod sa dungog sa mga sumusunod sa relihiyon sa ‘mga Saksi ni Jehova.’ Maorag tin-aw nga ang tuyo sa mga artikulo maoy pagyagyag sa mga sumusunod niini sa pagtamay sa publiko.” Nag-ingon ang korte nga ang mga artikulo “wala magbaton ug lehitimong paggamit sa katungod sa pagtaho ug sa pagsaway.” Gimultahan sa korte ang duha ka tigpakaulaw ug gimandoan usab sila sa pagbayad sa tanang gasto sa korte, lakip ang tanang legal nga mga gasto sa mga Saksi sa maong mga kaso.

Sa sinulat nga paghukom niini, ang Venice Court of Appeals mikomento: “Pinaagi lamang sa walay pagpihigpihig nga pagpatuman ug pagbantay sa tanang katungod nga gigarantiya sa [Italyanhong] Konstitusyon nga posibleng mapugngan ang mga porma sa pagkadi-matinugoton ug relihiyosong panatisismo.” Giila sa desisyon nga ang kalihokan sa mga Saksi ni Jehova dili sekreto ni mini-relihiyoso. “Ang paglakip sa mga Saksi uban sa sekretong mga grupo,” miingon ang korte, “wala gani magtahod sa sukdanan sa makasaysayanhong kamatuoran, sanglit ang giangkong relihiyon makita sa daghang siyudad ug ang kaylap nga buluhatong pagpangabig nga gihimo sa mga membro niini, ilabina sa mga Dominggo ug ubang mga pista opisyal, ilado kaayo ug makapatahod gayod tungod sa gihimong paningkamot, bisag unsa pay panglantaw sa usa sa gisangyaw nga doktrina.” Busa, ang talaan sa masibotong pagsangyaw ug sulondang panggawi sa mga Saksi ni Jehova sa Italya nakatabang sa pagpukgo sa pagkamapihigon batok kanila.​—Mateo 5:​14-​16; 1 Pedro 2:15.