Unsang Matanga sa Ngalan ang Imong Gihuptan?

SA BIBLIYA, ang pulong nga “ngalan” usahay nagtumong sa reputasyon sa usa ka tawo. Pananglitan, ang maalamong si Haring Solomon misulat: “Ang ngalan mas maayo kay sa maayong lana, ug ang adlaw sa pagkamatay kay sa adlaw sa pagkatawo.” (Ecclesiastes 7:1; itandi ang Proverbio 22:1.) Sumala sa mga pulong ni Solomon, ang tawo wala matawo uban ang maayong ngalan. Hinunoa, mabatonan niya ang usa ka reputasyon nga may tinuod nga kahulogan panahon sa dagan sa iyang kinabuhi. Ang iyang ngalan magpaila kaniya mahitungod sa iyang personal nga mga hiyas, kon kaha siya manggihatagon o hakog, mabination o dili-matinagdanon, mapainubsanon o mapahitas-on, bisan matarong o daotan.

Tagda si David. Panahon sa iyang pagkahari, gipamatud-an niya ang iyang kaugalingon nga lig-on ug dili-mapalingpaling. Sa samang panahon, mapainubsanong giila ni David ang iyang mga sayop ug naghinulsol sa iyang grabeng mga sala. May maayong katarongan, ang manalagna ni Jehova nagpaila nga si David maoy “usa ka tawo nga giuyonan sa kasingkasing [sa Diyos].” (1 Samuel 13:14) Ang batan-ong si David aduna nay maayong ngalan uban sa Diyos.

Sa kasukwahi, si Haring Jehoram sa Judea naghimog daotang ngalan alang sa iyang kaugalingon. Gipahilayo niya ang iyang mga sakop gikan sa pagsimba kang Jehova ug gipapatay bisan gani ang iyang unom ka igsoong lalaki ug ang pipila sa mga prinsipe sa Juda. Ngadtongadto, gihampak ni Jehova si Jehoram sa usa ka masakit nga balatian nga mitultol sa iyang kamatayon. Ang Bibliya nag-ingon nga si Jehoram “namatay nga wala kawilihi,” o ingon sa pagkasulti sa Today’s English Version, “walay usa nga nasubo sa dihang siya namatay.”—2 Cronicas 21:20.

Ang dalan sa kinabuhi ni David ug Jehoram nag-ilustrar sa kamatinud-anon sa panultihon sa Bibliya: “Ang handomanan sa matarong maoy angay sa panalangin, apan ang mismong ngalan sa daotan madunot.” (Proverbio 10:7) Busa angay nga ang matag usa kanato magkonsiderar nga ugdang sa pangutana nga, ‘Unsang matanga sa ngalan ang akong ginahimo uban sa Diyos ug sa akong isigkatawo?’