“Hataas Ingon sa Sedro sa Lebanon”

DIHA sa matahom nga kabukiran sa Lebanon nanubo ang mga kahoy nga nailhang Arz Ar-rab, nga nagkahulogang “mga Sedro sa Ginoo.” Kining mabagang berdeng kakahoyan, nga sa usa ka panahon milukop sa kabukiran, gihisgotan sa Bibliya mga 70 ka beses​—mas daghan kay sa bisan unsang ubang kahoy.

Sa paghubit sa hataas nga mga sedro sa Lebanon, ang Kasulatan naggamit sa mga pulong “pinili” ug “dako.” (Awit ni Solomon 5:15; Ezequiel 17:23) Ang gidak-on sa sedro ug ang kalig-on sa kahoy niana dugay nang nakapailado niini alang sa pagtukod ug mga balay ug mga barko maingon man usab sa paggamag muwebles. Ang kahumot ug siga nga pulang kolor sa kahoy maoy makapadani kaayo, ug ang pagkadaghan sa salong niini nagpahinabo niini nga mosukol sa pagkadunot ug sa pagkutkot sa insekto. Ang mga kahoy maoy taas kaayo ug nagbuntaog, nga nakaabot sa gitas-ong hangtod sa 37 metros ug ang sukod palibot sa lawas maoy hangtod sa 12 metros, ug kini dunay lalom, lig-ong mga gamot. Dili ikahibulong ang pipila ka modernong mga tigbantay sa lasang naghubit niini ingong “ang nagapurongpurong nga himaya sa kalibotan sa mga tanom”!

Ang magsusulat sa Bibliya nga si Ezequiel matagnaong mipakasama sa Mesiyas sa usa ka sanga sa sedro, nga ang Diyos mismo ang nagtanom. (Ezequiel 17:22) Sa pagkamatuod, ang Hebreohanong pulong sa “sedro” naggikan sa paninugdang kahulogang “magmalig-on.” Karong adlawa, ang mga sumusunod sa Mesiyas, si Jesu-Kristo, sa susama nagkinahanglang “mobarog nga lig-on diha sa pagtuo, . . . magmakusganon,” sama sa hataas, dili matarog nga sedro. (1 Corinto 16:13) Sa unsang paagi kini mapalampos? Pinaagig hugot nga pagsukol sa dili-kristohanong mga impluwensiya ug lig-ong paglahutay diha sa dalan sa integridad ug diyosnong debosyon. Kadtong nagbuhat sa ingon gihubit sa Bibliya ingong “ang matarong . . . [kinsa] motubo nga hataas ingon sa sedro sa Lebanon.”​—Salmo 92:12, The New English Bible.