Mga Magmamantala sa Gingharian Nagtaho
Ang Pagpangita sa Matuod nga Diyos Gigantihan
SA IKANAPULO nga siglo W.K.P., ang duha-ka-tribong gingharian sa Juda napuno sa bakak nga pagsimba. Hinunoa, taliwala niining kaylap nga idolatriya, dihay nagkinabuhing tawo kansang kasingkasing matarong ngadto sa Diyos. Ang iyang ngalan mao si Jehosafat. Si propetang Jehu miingon mahitungod kaniya: “Dunay maayong mga butang nga nakita kanimo, tungod kay imong . . . giandam ang imong kasingkasing sa pagpangita sa matuod nga Diyos.” (2 Cronicas 19:3) Sa susamang paagi karon, niining “makuyaw nga mga panahong lisod sagubangon,” minilyon nga katawhan ang ‘nag-andam sa ilang mga kasingkasing’ sa pagpangita sa matuod nga Diyos, si Jehova. (2 Timoteo 3:1-5) Gipamatud-an kini sa mosunod nga kasinatian gikan sa Togo, Kasadpang Aprika.
Si Casimir nagtungha sa usa ka Katolikong eskuylahan ug nakabaton sa iyang unang Pagkalawat sa edad nga nuybe anyos. Ugaling, pag-abot niya sa edad nga 14 wala na magsimba si Casimir. Nagpahinabo kini kaniyang magkinabuhi sa kahadlok tungod kay nagtuo siyang ang pagsipyat ug tambong sa Misa mosangpot sa iyang pag-adto sa kalayonhong impiyerno, o labing menos sa purgatoryo.
Sa eskuylahan miapil si Casimir sa usa ka grupo sa mga batan-on nga nagtigom makausa sa usa ka semana aron magtuon sa Bibliya. Misugod usab siya sa pagbasa sa Bibliya sa personal. Usa ka higayon nabasa ni Casimir diha sa basahon sa Pinadayag ang bahin sa makahahadlok nga mapintas nga mananap nga migula sa dagat. (Pinadayag 13:1, 2) Sa dihang iyang gipangutana ang pangulo sa grupo sa pagtuon sa Bibliya mahitungod niini, gisultihan siya nga tinuod ang mananap ug nga tinuod kining mogula sa dagat. Kini nga pagpatin-aw nakasamok kang Casimir tungod kay nagpuyo siya duol sa Baybayon sa Atlantiko. Nakaseguro siyang malakip siya sa unang mga biktima sa mapintas nga mananap.
Nagsugod si Casimir sa pagtigom sa iyang kuwarta aron makakalagiw siya ngadto sa desyerto sa amihanan aron malikayan ang mapintas nga mananap. Iyang gisuginlan ang iyang klasmet maylabot sa iyang mga plano. Ingong usa sa mga Saksi ni Jehova, ang maong klasmet nagpasalig kaniya nga walay ingon nianang literal nga mananap nga mogula sa dagat. Wala madugay human niana, gidapit si Casimir sa mga tigom sa Kingdom Hall. Nalipay siya sa mga tigom ug misugod sa pagtambong nga regular. Midawat usab siyag pagtuon sa Bibliya sa balay.
Samtang nag-uswag si Casimir sa iyang pagtuon, misugod ang pagsupak sa pamilya. Ang iyang pamilya nagbuhat ug pagsimba sa katigulangan ug mokaog karneng wala makatulo ang dugo nga salin gikan sa mga paghalad. Sa dihang si Casimir matinahurong mibalibad sa pagkaon sa karne, gihulga siya ug giingnan nga mohawa sa balay. Nagpabiling kalmado si Casimir, ug ang mga hulga wala himoa. Apan, sulod sa tulo ka bulan, ang ingon niana lamang nga karne ang ginasilbi sa mga pagkaon sa pamilya. Problema ni Casimir ang pagbaton ug igong pagkaon, apan iyang naagwanta kini ug ang ubang mga kalisdanan.
Si Casimir padayon sa paghimog espirituwal nga pag-uswag hangtod sa punto sa pagpahinungod ug bawtismo. Sa ulahi, gitudlo siya ingong ministeryal nga alagad ug mitambong sa ikaupat nga klase sa Tunghaan sa Ministeryal nga Pagbansay sa Togo. Sa pagkakaron, nalipay siya sa paghimog boluntaryong buluhaton sa sangang buhatan.
Oo, pagkatinuod sa mga pulong ni Haring David nga napamatud-an sa daghang higayon: “Kon imong pangitaon [si Jehova], iyang tugotan ang iyang kaugalingon nga makaplagan nimo.”—1 Cronicas 28:9.
[Mga hulagway sa panid 8]
Si Casimir (tuo) nalipay sa boluntaryong buluhaton sa sangang buhatan