Ikaw ba Naghunahunang Magminyo?
Kon atong itandi ang nagakahitabong diborsiyo sa kalibotan sa usa ka linog, ang Tinipong Bansa mahimong sentro sa linog. Sa katuigang dili pa dugay, kapin sa usa ka milyong kaminyoon ang gitapos didto—may aberids nga duha sa matag minuto. Apan tingali nakamatikod ka nga wala gayod mag-inusara ang Tinipong Bansa sa suliran niini labot sa kaminyoon.
SUMALA sa usa ka pagtuon, ang gidaghanon sa diborsiyo sa Canada, Gresya, Inglaterra ug Wales, ang Netherlands, ug Pransiya midoble pa sukad sa 1970.
Kita adunay dakong katarongan sa pagtuo nga ang kadaghanang parisan mosulod sa kaminyoon tungod kay sila naghigugmaay sa usag usa ug buot mogugol sa nahibiling panahon sa ilang mga kinabuhi nga magkauban. Apan, makasubo, ang pagdamgo ug usa ka malipayong kaminyoon kasagarang ingon lamang gayod niana—usa ka damgo. Sa makamata sa tinuod nga kahimtang, daghan ang nag-ingon nga sayo ra kaayo silang nagminyo o naminyo sa sayop nga tawo o sa duha niini nga katarongan.
Nganong daghan kaayong kaminyoon nga dili-malamposon? “Ang pangunang katarongan mao ang kakulag pangandam,” nag-ingon ang awtor sa usa ka libro bahin sa panagtratohay. Siya midugang: “Sa atubangon ko ang mga magtiayon nga adunay problema sa kaminyoon lamyon ako sa duha ka pagbati—kaluoy ug kasuko. Mobati ako ug kaluoy tungod kay wala nila makab-ot ang ilang mga damgo nga makabaton ug makatagbawng relasyon sa usag usa. Mobati ako ug kasuko tungod sa ilang pagkawalay-alamag sa kakomplikado sa pagkab-ot ug malamposong kaminyoon.”
Tinuod, daghan ang mosulod sa kaminyoon nga gamay ra o walay ideya kon unsaon pagpalampos niini. Bisan pa, dili gayod kini ikahibulong. Usa ka edukador miingon: “Pila ba sa atong mga batan-on ang moeskuyla sa kolehiyo aron tun-an ang bahin sa kinaiya sa mga ilaga ug mga tiki, apan walay nakamaohan bahin sa kinaiya sa duha ka tawo nga gitawag ug bana ug asawa?”
Naghunahuna ka ba bahin sa kaminyoon—kaha bahin sa posibleng umaabot nga kaminyoon o nianang imong kaminyoon karon? Kon mao, angay kang mahibalo nga ang tinuod-sa-kinabuhi nga relasyon lahi kaayo gikan nianang gilarawan sa mga pelikula, sa salida sa telebisyon, ug sa mga nobela nga romansa. Sa samang panahon, ang kaminyoon sa duha ka tawong hamtong nga tinuod nga naghigugmaay sa usag usa maisip nga usa ka panalangin gikan sa Diyos. (Proverbio 18:22; 19:14) Nan, sa unsang paagi makatino ka nga ikaw andam na sa pag-atubang sa mga panginahanglan sa kaminyoon? Unsang mga butanga ang angay nimong palandongon sa pagpilig usa ka kapikas? O kon ikaw minyo na, sa unsang paagi imong mapauswag ang posibilidad sa pagkakaplag ug dumalayong kalipay sa imong kaminyoon?