Giya sa Pagpili ug Maayong Kaubanan

ANG mga batan-on modangop sa ilang mga isigkaingon inay kay sa ilang mga ginikanan alang sa giya sa pagpili ug sinina ug musika, matod pa sa usa ka taho sa Reader’s Digest. Busa hinungdanon kaayong mahibaloan sa mga ginikanan kon kinsa ang gipakig-ubanan sa ilang mga anak ug diin.

“Imong responsibilidad nga magsusi,” matod ni Esmé van Rensburg, pangunang tigpakigpulong sa departamento sa sikolohiya sa usa ka unibersidad sa Habagatang Aprika. Siya midugang: “Lagmit mapikal ang imong anak kanimo, apan sila mokalma ra.” Dayon gihatag niya ang mosunod nga mga sugyot sa mga ginikanan. Ang mga lagda kinahanglang makataronganon ug dunay tinong nagpaluyong mga prinsipyo; pamati sa imong anak; ayaw paghinobra sa imong reaksiyon, kondili pagpabiling kalmado, ug hibaloi kon unsay buot nimong isulti. Kon ang imong anak nakaugmad na ug panaghigalaay sa dili-maayong kauban, itumong ang pagtagad sa dili-maayong batasan nga gipatungha sa panaghigalaay inay kay did-an lamang nga makig-uban pa.

Ang maayong tambag alang sa mga ginikanan dugay nang mabasa diha sa Pulong sa Diyos, ang Bibliya. Pananglitan, kini nag-ingon: “Magmaabtik sa pagpaminaw, magmahinay sa pagsulti, magmahinay sa kapungot.” (Santiago 1:19) Ang Kasulatan naghatag usab niining maayong tambag bahin sa pagpili ug kaubanan: “Siya nga nagalakat uban sa mga tawong manggialamon mahimo usab nga manggialamon, apan siya nga adunay pakiglabot uban sa mga buangbuang dili maayo ang dangatan.” (Proverbio 13:20) Kining maong mga panig-ingnan nag-ilustrar sa kaalam nga mabatonan niadtong nagbasa sa Bibliya uban ang pagpabili ug nagpadapat sa giingon niini diha sa adlaw-adlaw nga kinabuhi.