Rasismo ug Relihiyon

SA DIHANG miabot ako sa T.B. sa 1978, ako nagtuo nga dugay nang nasulbad sa Amerika ang mga problema niini sa rasa, nga ang mga itom maoy managsamang mga lungsoranon,” nag-ingon si Mark Mathabane, usa ka awtor nga gipanganak sa Habagatang Aprika, diha sa usa ka interbiyo sa Time nga magasin. “Sa daghang paagi, akong nakita nga matuod kana. Ang T.B. daw usa ka gatos ka tuig nga abante kay sa Habagatang Aprika. Unya akong nadiskobrehan, sa akong kakurat, nga wala kaayoy nausab diha sa mga kasingkasing sa mga tawo.” Unsay naghatod kaniya sa maong makakurat nga diskobre?

“Usa sa labing gipinig nga mga oras sa Amerika mao ang alas 11 s.b. sa Dominggo,” matod ni Mathabane. Iyang namatikdan nga bisan diha sa simbahan, ang mga tawo nagpanuko sa pagduyog sa pagsimba uban niadtong lahig rasa. “Unsa kahay ilang pagbati sa ubang adlaw sa semana?” siya nangutana. Sa paghisgot sa panginahanglan sa edukasyon nga mao ang makapahinabog kausaban, si Mathabane nag-ingon: “Pinaagi sa edukasyon makakat-on kang modawat sa pagkamanagsama sa mga tawo.”

Ang mga Saksi ni Jehova mouyon nga edukasyon ang tubag, apan sila ilabinang nagrekomendar sa edukasyon nga pinasikad sa Pulong sa Diyos. Oo, ang Bibliya nagtabang kanila sa pagbuntog sa kababagan sa pagpihigpihig sa rasa​—bisan sa kayutaan diin nagdagsang ang etnikong pagdumot. Kada semana diha sa ilang mga Kingdom Hall, ang mga tawo sa nagkadaiyang mga rasa ug mga nasyonalidad magtigom aron maedukar sa mga kasugoan ug mga prinsipyo sa Pulong sa Diyos, ang Bibliya. Walay koleksiyon nga ginahimo niining mga tigoma. Ikaw gidapit sa pagtambong!