Sila “Nahadlok sa Matuod nga Diyos”

SAMTANG ang mga Israelinhon naulipon sa Ehipto, ang Hebreohanong mga mananabang nga si Sifra ug Pua nahimutang sa makapaguol nga kahimtang. Sa paningkamot nga kutohan ang kusog nga pagdaghan sa langyaw nga populasyon, gibaoran ni Paraon kining mga bayhana: “Sa dihang manabang kamo sa mga babayeng Hebreohanon . . . , kon kini anak nga lalaki, inyo usab gayod kining patyon.”​—Exodo 1:15, 16.

Si Sifra ug Pua “nahadlok sa matuod nga Diyos,” busa nagmaisogon sila ug “wala mobuhat sumala sa gipamulong kanila sa hari sa Ehipto.” Hinunoa, ilang gitipigang buhi ang mga masusong lalaki, bisan pag kining maisogong baroganan mahimong magpameligro kanila. Si Jehova “nagbuhat ug maayo ngadto sa mga mananabang,” ug iyang gigantihan sila tungod sa ilang nagaluwas-kinabuhing mga buhat.​—Exodo 1:17-21.

Kining asoya nagpasiugda sa pagpabili ni Jehova niadtong nag-alagad kaniya. Mahimong iyang isipon ang gihimo ni Sifra ug Pua, bisan pag maisogon, ingong makitawhanon lamang. Total, walay babayeng may maayong panghunahuna ang mopatay ug mga masuso! Sa gihapon, si Jehova sa walay duhaduha naghunahuna sa kamatuoran nga ang pipila ka tawo, tungod sa kahadlok sa tawo, nakahimog dulumtanang mga buhat. Nasayod siya nga kining maong mga mananabang napalihok dili lamang tungod sa tawhanong kalulot kondili usab tungod sa diyosnong kahadlok ug debosyon.

Pagkamapasalamaton nato nga nag-alagad sa usa ka Diyos nga makamatikod sa atong matinumanong mga buhat! Tinuod, lagmit walay usa kanato ang nakaatubang ug pagsulay sa pagtuo nga nasinati ni Sifra ug Pua. Apan, kon kita mobarog nga malig-on alang sa kon unsay matarong​—sa eskuylahan man, sa atong trabahoan, o sa bisan unsang laing kahimtang—​dili ibalewala ni Jehova ang atong maunongong gugma. Sa kasukwahi, siya “maoy tigganti sa mga matinuorong nagapangita kaniya.” (Hebreohanon 11:6) Oo, “ang Diyos dili usang dili-matarong nga kalimtan ang inyong buhat ug ang gugma nga inyong gipakita alang sa iyang ngalan, sa pagkaagi nga kamo nakaalagad sa mga balaan ug padayong nagaalagad.”​—Hebreohanon 6:10.