Makatabang ba ang Bibliya Kanato Karon?
“KON susihon ang Bibliya sa kinatibuk-an, mga 1 ka porsiyento ang maayong basahon, apan ang nahibilin dili mapuslanon ug kinaraan.” Mao kanay giingon sa usa ka batan-ong lalaki. Daghan ang mouyon kaniya. Bisan ug ang Bibliya labing-himalitan gihapon sa tibuok kalibotan, milyonmilyon ang diyutay kaayog pagpabili niini ug dili sinati sa mga pagtulon-an niini.
Sa 1996 nga edisyon niini sa Pasko, ang Alemang mantalaang Süddeutsche Zeitung nagkomento nga ang Bibliya “dunay nagkadiyutay nga mga magbabasa. Sa panahon sa natural nga siyensiya ug nag-uswag nga sekularisasyon, alang sa daghan ang Biblikanhong mga asoy morag katingad-an ug lisod sabton.” Ang mga surbi nagpamatuod niining maong taho. Ang pipila ka pagtuon nagbutyag nga daghang bata wala gani masayod kon kinsa gayod si Jesus. Sa usa ka surbi, wala pay katunga sa mga tawong giinterbiyo ang nakaasoy sa mga estorya sa Bibliya bahin sa anak nga mausikon ug sa maayong silingan nga Samaritanhon.
Ang publikasyong Reformiertes Forum sa Swiss Evangelical Church nag-ingon nga sa Switzerland ang panginahanglan alang sa Bibliya dili na parehas kaniadto. Bisan taliwala niadtong dunay kopya sa Bibliya, kini kasagarang giabog-abogan lamang diha sa estante. Sa Britanya ang kahimtang mao gihapon. Sumala sa usa ka surbi, bisag kadaghanan sa katawhan adunay Bibliya, ang kinabag-an wala gayod makabasa niana sukad.
Sa laing bahin, milyonmilyon sa tibuok kalibotan lahi ug pagbati bahin sa Bibliya. Ilang gilantaw kini ingong Pulong sa Diyos ug giisip kini nga hinungdanon ug mapuslanon. Busa, ginabasa nila kini nga makanunayon. Usa ka batan-ong babaye misulat: “Akong gisulayan pagbasa ang usa o duha ka kapitulo sa Bibliya kada adlaw. Ako nalingaw pag-ayo niini.” Ang maong mga tawo maampingong nagtagad kon unsay gitudlo sa Bibliya, ug ilang gisulayan pagpadapat ang mga tambag niini sa ilang kinabuhi. Sila nagtuo nga ang Bibliya makatabang kanila niining gubot nga kalibotan karon.
Unsay imong opinyon? Dili na ba mahinungdanon ang Bibliya sa modernong kapanahonan? O kini ba bililhon ug mapuslanon? Makatabang ba ang Bibliya kanato karon?