Ang Iyang Gikamingawan sa Siyudad sa New York

ANG karatula nga makita dinhi gipasundayag nga dayag diha sa usa sa mga pabrika sa Watchtower Society sa Brooklyn, New York, sukad sa katuigang 1950. Ang mga tigbiyahe, mga turista, ug uban pa nga manglabay gipahinumdoman sa pagbasa sa Bibliya sa adlaw-adlaw. Ang mosunod nga sulat, nga nadawat gikan sa usa ka batan-ong babayeng Saksi, nagpakita sa kaepektibo niini nga pahinumdom.

“Ako nakighisgot sa usa ka klasmet kon unsay akong buot buhaton sa dihang matapos nako ang hayskul. Gisugdan ko ang paghisgot bahin sa Bethel, ang hedkuwarter sa mga Saksi ni Jehova, ug siya nahinam pag-ayo. Gisultihan niya ako nga siya nagpuyo sa Siyudad sa New York sa tibuok niyang kinabuhi. Ang iyang pamilya dili kaayo relihiyoso, apan matag buntag sa dihang siya molantaw sa bentana, adunay karatula nga mabasa ‘Read God’s Word the Holy Bible Daily.’ Busa matag adlaw siya mobasa sa iyang Bibliya sa dili pa siya moeskuyla.

“Human nga mibalhin sa gawas sa siyudad, siya miingon nga ang butang nga iyang gikamingawan bahin sa Siyudad sa New York mao nga sa dihang siya mobangon, dili na niya makita ang pahinumdom nga basahon ang iyang Bibliya. Apan tungod sa karatula diha sa tinukod sa Watchtower, ang pagbasag Bibliya nahimo nang usa ka batasan, busa siya nagpadayon sa pagbasa sa Bibliya sa adlaw-adlaw!”

Wala nay mas maayong paagi sa pagsugod sa adlaw kay sa pagbasa sa usa ka bahin sa Pulong sa Diyos! Sa pagbuhat sa ingon, ikaw sa walay duhaduha makapabili sa mga pulong ni apostol Pablo: “Ang balaang mga sinulat . . . makapahimo kanimong maalamon alang sa kaluwasan pinaagi sa pagtuo may kalabotan kang Kristo Jesus.”—2 Timoteo 3:15-17.