Usa ka Espesyal nga Okasyon—Atua Ka ba Unya Didto?

SA USA ka halandomong adlaw kapin sa 3,500 ka tuig kanhi, si Jehova nga Diyos nagsugo nga ang matag panimalay sa naulipong mga Israelinhon sa Ehipto magpatay ug usa ka kordero o kanding ug magwisik sa dugo niini diha sa mga hamba sa pultahan ug sa mga balabag sa ilang mga balay. Niana mismong gabhiona, ang manulonda sa Diyos misaylo sa mga balay nga gimarkahan niining paagiha apan nagpatay sa mga panganay diha sa mga balay sa tanang Ehiptohanon. Dayon ang mga Israelinhon gipagawas. Sa anibersaryo sa maong hitabo, ang mga Hudiyo nagsaulog sa Paskuwa.

Dihadiha human matapos si Jesu-Kristo pagsaulog sa iyang kataposang Paskuwa uban sa iyang mga apostoles, iyang gisugdan ang panihapon nga maghandom sa iyang haladnong kamatayon. Gihatagan niya ang iyang mga apostoles ug walay-lebadura nga tinapay ug miingon: “Pagkuha kamo, kaon. Kini nagakahulogan sa akong lawas.” Dayon gihatagan niya sila ug kopa sa bino ug miingon: “Uminom gikan niini, kamong tanan; kay kini nagakahulogan sa akong ‘dugo sa kasabotan,’ nga igabubo alang sa daghan sa kapasayloan sa mga sala.” Si Jesus miingon usab: “Padayong buhata kini sa paghandom kanako.” (Mateo 26:26-28; Lucas 22:19, 20) Busa gisugo ni Jesus ang iyang mga sumusunod sa paghandom sa iyang kamatayon.

Niining tuiga ang anibersaryo sa kamatayon ni Jesus natunong sa Miyerkoles, Abril 19, human sa pagsalop sa adlaw. Ang mga Saksi ni Jehova sa tibuok kalibotan magtigom niining espesyal nga gabii sa pagsaulog niini nga Memoryal sa paagi nga gibaod ni Jesus. Ikaw mainiton gayong gidapit sa pagduyog kanamo ingong mga maniniid. Palihog susiha sa mga Saksi ni Jehova sa inyong dapit ang eksaktong oras ug dapit nga pagatigoman.