Namatay Siya Tungod sa Prinsipyo

“KAMI nahinumdom kang August Dickmann (natawo 1910), usa sa mga Saksi ni Jehova.” Ingon niini ang pasiuna sa sinulat diha sa plaka (gipakita dinhi) nga di pa dugayng gibuksan diha sa kanhing kampong konsentrasyon sa Sachsenhausen. Nganong ang usa sa mga Saksi ni Jehova takos nianang plakaha? Ang nahibiling sinulat nagsugid sa estorya: “[Siya] gipusil sa SS atubangan sa publiko niadtong Septiyembre 15, 1939, tungod sa matanlagong pagsupak.”

Si August Dickmann gibalhog sa kampong konsentrasyon sa Sachsenhausen niadtong 1937. Tulo ka adlaw human sa pagbuto sa Gubat sa Kalibotan II sa 1939, siya gimandoan sa pagpirma sa papeles sa iyang pagkarekluta sa militar. Sa dihang siya midumili, gikontak sa komandante sa kampo si Heinrich Himmler, pangulo sa SS (Schutzstaffel, piniling guwardiya ni Hitler), ug nangayog pagtugot sa pagpatay kang Dickmann atubangan sa tanang ubang mga priso sa kampo. Sa Septiyembre 17, 1939, ang The New York Times nagtaho gikan sa Alemanya: “Si August Dickmann, 29 anyos, . . . gipusil dinhi pinaagi sa firing squad.” Ang mantalaan nag-ingon nga siya ang unang Aleman nga matanlagong misupak nianang gubata.

Kan-uman ka tuig sa ulahi, sa Septiyembre 18, 1999, ang kamatayon ni Dickmann gihandom sa Brandenburg Memorial Foundation, ug ang handomanang plaka nagpahinumdom karon sa mga bisita sa iyang kaisog ug lig-ong pagtuo. Ang ikaduhang plaka diha sa gawas nga bungbong sa kanhing kampo nagpahinumdom sa mga bisita nga si Dickmann maoy usa lamang sa mga 900 ka Saksi ni Jehova nga nag-antos sa Sachsenhausen tungod sa ilang mga pagtulon-an. Daghan pa ang nag-antos sa ubang mga kampo. Oo, bisan ilalom sa grabeng mga kahimtang sa mga kampong konsentrasyon, daghan ang nagpabiling matinumanon sa diyosnong mga prinsipyo.

Para sa mga Saksi ni Jehova, usa ka Kristohanong katungdanan nga “magpasakop sa labaw nga mga awtoridad [sa kagamhanan].” (Roma 13:1) Apan, sa dihang ang mga kagamhanan mosulay sa pagpugos kanila sa paglapas sa mga balaod sa Diyos, sila mosunod sa panig-ingnan sa mga apostol ni Kristo, kinsa miingon: “Kinahanglang among sugton ang Diyos ingong magmamando inay kay sa mga tawo.” (Buhat 5:29) Ingong resulta, sa usa ka kalibotan diin ang mga pagdumtanay sa tribo ug mga panag-away sa minoriya mitultol sa makalilisang nga mga kapintasan, ang mga Saksi ni Jehova bisan asa, sama ni August Dickmann, makigdaiton. Sila nagtuman sa tambag sa Bibliya: “Ayaw itugot ang imong kaugalingon nga daogon sa daotan, apan padayong daoga ang daotan pinaagi sa maayo.”—Roma 12:21.