Mga Ginikanan Tutol sa Pagkamapihigon sa Magtutudlo

Usa ka magtutudlo sa tunghaang elementarya sa Cassano Murge, Italya, nagpadalag mga sticker sa pipila sa iyang mga estudyante sa ilang pagpamauli. Kini nga mga sticker, nga gituyo aron ipatapot sa atubangang pultahan sa balay, may pahibalo: “Mga Katoliko kami. Ang mga Saksi ni Jehova gihangyo nga dili manuktok niining pultahana.”

Ang ubang mga ginikanan sa mga estudyante, bisan tuod dili mismo mga Saksi ni Jehova, tutol kaayo sa gihimo sa magtutudlo. Sumala sa mantalaang Muoviti Muoviti, ang mga ginikanan nagsumbong nga ‘ang paghatag sa mga bata ug ingon niining matanga sa mensahe makaimpluwensiya kanila sa pagsalikway kang bisan kinsa nga dili sama nilag hunahuna o sa pagpihig sa usa ka tawo tungod kay “lahi” ang iyang relihiyon.’ Usa ka ginikanan nga misulat ngadto sa mantalaan mitawag sa sticker nga “ang binhi sa makadaot nga impluwensiya, ang resulta sa pagkawalay-hibangkaagan ug kabuangan.”

Ingon sa gipasundayag niining maong taho, daghang tawong makataronganon ang nakasabot sa kapeligrohan sa pagsabwag ug mga binhi sa pagkamapihigon. Sila usab adunay pagtahod sa Kristohanong ministeryo nga gibuhat sa mga Saksi ni Jehova sa tibuok Italya ug sa tibuok kalibotan. Nganong dili mangutana sa mga Saksi sa ‘katarongan sa paglaom nga anaa kanila’? Sila maikag sa paghisgot niini uban kanimo, nga himoon kini uban ang “halawom nga pagtahod.”—1 Pedro 3:15.