Usa ka Leksiyon Gikan sa Marinero
ANG paglawig nga mag-inusara diha sa lawod makapaluya. Gumikan sa hilabihang kakapoy ikapameligro sa marinero ang iyang kaugalingon, mao nga magkasayopsayop siya ug dili na makahimog maayong mga desisyon. Tungod niini, iyang mapabilhan ang angkla. Magtugot kini sa lapoy nang marinero sa pagpahulay ug pagpahiuli sa kalagsik nga dili mameligrong maanod. Sa samang panahon, ang angkla moduso sa dulong sugat sa hangin ug mga balod ug busa dili mapadpad ang sakayan.
Maingon nga ang mga marinero nag-atubang ug daghang kapeligrohan sa dagat, ang mga Kristohanon nag-atubang ug kanunayng mga pagpit-os niining kalibotana ug mibati sa panginahanglan nga mopahulay. Sa pagkamatuod, si Jesus kas-a misugyot sa iyang mga tinun-an: “Umari, kamo mismo, nga magkinaugalingon ngadto sa usa ka mingaw nga dapit ug pamahulay ug diyutay.” (Marcos 6:31) Karong adlawa, ang uban tingali mogugol ug pipila ka semana sa pagbiyahe o mogugol sa hinapos-sa-semana sa laing dapit aron morelaks uban sa ilang pamilya. Kining mga higayona makapahayahay ug makapalagsik. Apan, sa unsang paagi makaseguro kita nga kita hilwas sa espirituwal sa maong mga panahon? Unsay magsilbing atong espirituwal nga angkla nga motabang kanato nga dili maanod ug magpabiling lig-on?
Si Jehova madagayaong mihimog tagana nga atong mabatonan. Kini mao ang iyang Balaang Pulong, ang Bibliya. Pinaagi sa pagbasa niini sa adlaw-adlaw, kita makapabiling suod kang Jehova ug dili gayod maanod pahilayo kaniya. Ang tambag niini makapalig-on kanato ug makapaarang kanato sa pagbarog batok sa mga tentasyon ni Satanas ug sa iyang kalibotan. Ang atong pagmentinar ug regular nga programa sa pagbasa sa Bibliya, bisan sa panahon nga dili apil sa atong kasagarang eskedyul, mahimong atong angkla sa espirituwal.—Josue 1:7, 8; Colosas 2:7.
Ang salmista nagpahinumdom kanato nga “malipayon ang tawo” kansang “kalipay anaa sa balaod ni Jehova, ug sa iyang balaod siya nagabasa sa hinayng tingog sa adlaw ug gabii.” (Salmo 1:1, 2) Ang pagbasa sa Pulong sa Diyos sa adlaw-adlaw mohatag kanatog “malipayon” nga resulta sa pagkahimong tinuod nga napalagsik ug napalig-on, nga andam sa pagpadayon sa atong Kristohanong dalan.