“Usa ka Panig-ingnan sa Panaghiusa”

MAO kana ang ulohan sa editoryal nga gipatik diha sa usa ka mantalaan sa Indaiatuba, São Paulo, Brazil. Kinsa ang nagpakitag panig-ingnan? “Ang mga Saksi ni Jehova, kinsa nagplano sa pagtukod ug bag-ong ‘Kingdom Hall,’ ingon sa pagtawag sa ilang mga templo o mga awditoryum, naghatag ug positibo ug makita nga panig-ingnan sa pakigtambayayongay nga dili gayod mahimong ibalewala,” nagsaysay ang magsusulat.

Dayag ang panaghiusa taliwala sa mga Saksi ni Jehova sa maong mga okasyon. Busa, ang artikulo nagpunting: “Makapatandog nga makita ang mga boluntaryong lalaki, babaye, ug mga tin-edyer nga kinabubut-ong nagtambayayongay sa pagtukod ug dapit diin sila mahimong magtigom ug magsimba sa Diyos.”

Ang mga Saksi ni Jehova naghatag usab ug maayong panig-ingnan sa laing mga paagi. “Gawas pa sa pagtuon ug pag-ampo, ang ilang tumong mao ang pagpahiuli sa mga alkoholiko ug mga giyanon sa droga ug pagpaila sa mga tawo sa dalan sa panaghiusa ug gugma,” midugang ang editoryal. Sa unsang paagi nakab-ot nila kini? Ang mga Saksi nahibalo nga ang pagkat-on ug pagpadapat sa tambag sa Bibliya motabang sa usa ka tawo sa pagbiya sa mga bisyo. Mao nga sila nanlimbasog sa pagtudlo sa uban kon unsay ilang nakat-onan gikan sa Bibliya. Ang editoryal nanghinapos nga ang ilaha maoy “usa ka panig-ingnan nga, sa walay duhaduha, kinahanglan gayong sundon.”

Ang mga tigom sa mga Saksi ni Jehova maoy bukas alang sa publiko ug walay mga pagpangolekta nga himoon. Ikaw mainitong gidapit sa pag-adto sa Kingdom Hall nga duol nimo.