Kalinaw sa Kalibotan—Sa Unsang Paagi?
HADUOL na bang makab-ot ang kalinaw sa kalibotan? Daghan kaniadto ang naghunahuna niana apan karon nagduhaduha na. Sumala sa usa ka taho nga naghisgot sa mga suliran sa atong umaabot, nga gipatik sa Daily Mail & Guardian sa Habagatang Aprika, “ang mga panagna bahin sa bag-ong internasyonal nga sistema sa katilingban ug politika nga gibungat 10 ka tuig pa lang kanhi sa pagkakaron daw dili na masanagon.”
Gibanaag sa mga awtor ang malaomong espiritu nga nangibabaw usa lamang ka dekada ang milabay. Mao pa lamay pagkatapos sa Bugnawng Gubat, ug wala nay panagbangi sa gamhanan kaayong mga nasod. Sa gikaingong pagsugod sa usa ka bag-ong yugto sa panahon, daghan ang nagdahom nga ang katawhan mosugod sa paghimog dakong kauswagan sa pagsagubang sa kakabos, sakit, ug mga isyu labot sa kalikopan. “Kadtong maanindot nga mga panagna wala nay paglaom nga mahitabo karon,” ang taho nag-ingon. “Ang bag-ong mga panag-away mibuto sa mga dapit nga wala lang kita mahibalo; ang kakabos sa kalibotan padayong misulbong. Adunay duha ka bag-ong nasod nga nagbaton ug nukleyar nga mga hinagiban. Ang reputasyon sa HK grabeng nahuyang tungod sa kulang nga pagsanong ngadto sa sunodsunod nga makitawhanong mga krisis. Ang kiling nausab gikan sa mithianon ngadto sa dili-mithianon.”
Ang mga estudyante sa Bibliya nakaamgo nga ang mga paningkamot sa tawo, bisan unsa pa ka maayo, dili gayod molampos. Nganong dili? Tungod kay, sumala sa giingon sa Bibliya, “ang tibuok kalibotan nahimutang diha sa gahom sa tuman-kadaotang usa.” (1 Juan 5:19) Samtang nailalom sa pagkontrolar ni Satanas, ang kalibotan dili mahimong ibalik ngadto sa Paraisong kahimtang nga alang niana kini gilalang sa Diyos.
Sa samang panahon, adunay pasikaranan sa pagbatog masanagong panglantaw. Si Jehova nga Diyos misaad sa pagpatunghag kalinaw sa kalibotan, dili pinaagi sa pag-ayom-ayom niini nga sistema sa mga butang, kondili pinaagi sa pagpatunghag “usa ka bag-ong yuta” nga niana “magapuyo ang pagkamatarong.” (2 Pedro 3:13) Oo, pinaagi sa Gingharian sa Diyos, ang atong yuta pagabag-ohon ngadto sa usa ka malinawon, malipayong puy-anan, diin ang kinabuhi ug trabaho mahimong makapalipay kanunay alang sa tanang masinugtanong katawhan. Dugang pa, ang Diyos nagsaad nga “pahiran ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa.” Kini nga mga saad wala ipasukad diha sa dili kasaligan nga mga panagna sa mga tawo. Hinunoa, kini gipasukad diha sa dili masayop nga Pulong sa Maglalalang, kinsa dili makabakak.—Pinadayag 21:4; Tito 1:2.