Ang Pangsulod nga Katahom Adunay Malungtaron nga Bili

“GITUMBAS SA USA KA BATAN-ONG LALAKI ANG KATAHOM UBAN SA KALIGDONG,” MIINGON ANG USA KA MATINUMANONG TIGULANG NGA KRISTOHANON.

Oo, dugay na nga ang tawo mihatag ug dili-angayng pagpasiugda sa panggawas nga katahom, nga kasagarang mosangko sa sayop nga panghukom bahin sa pangsulod nga mga hiyas. Ang atong Maglalalang, hinunoa, motan-aw kon unsa kita sa kinasuloran, walay sapayan sa atong panggawas nga panagway. Niining paagiha iyang gipakita ang kinamaayohang panig-ingnan sa hamtong nga paghukom. Sumala sa Bibliya, ang Diyos mismo nag-ingon: “Ang pagtan-aw sa tawo dili sama sa pagtan-aw sa Diyos, tungod kay ang tawo nagatan-aw sa makita sa iyang mga mata; apan alang kang Jehova, siya nagatan-aw sa kasingkasing.”—1 Samuel 16:7.

Ang Diyos mao ang Tinubdan sa tinuod nga tawhanong katahom, ug ang iyang Pulong nagpadayag nga sa dihang magtimbangtimbang sa tinuod nga bili sa usa ka tawo, ang espirituwal nga mga hiyas mao ang labing hinungdanon. Ang Bibliya nag-ingon: “Ang pagkamakabibihag mahimong malimbongon, ug ang kaanyag mahimong kawang; apan ang babaye nga nahadlok kang Jehova mao ang makabaton ug pagdayeg alang sa iyang kaugalingon.” (Proverbio 31:30) Sa pagkamatuod, ang panggawas nga pagkamadanihon mahimong takoban sa pangsulod nga kangil-ad. (Ester 1:10-12; Proverbio 11:22) Bisan tuod ang pisikal nga katahom malawos sa paglabay sa panahon, ang pangsulod nga katahom—ang mga hiyas sa kasingkasing—motubo ug molungtad.

Busa, pagkamaalamon nga ugmaron ang mga hiyas sama sa gugma, kalipay, pakigdait, taas-nga-pailob, kalulot, pagkamaayo, pagtuo, kalumo, ug pagpugong-sa-kaugalingon! (Galacia 5:22, 23) Nianang paagiha atong maangkon ang pangsulod nga katahom, nga tinuod gayong adunay malungtaron nga bili.—1 Pedro 3:3, 4.