Haduol na Ba ang Panaghiusa sa Relihiyon?
“Atong nasaksihan ang usa ka hinungdanong adlaw sa kasaysayan sa atong mga iglesya,” miingon si Christian Krause, presidente sa Lutheran World Federation. Sa susama, si Papa Juan Paulo II naghisgot bahin sa “usa ka hinungdanong yugto diha sa malisod nga dalan alang sa pagtukod pag-usab sa bug-os nga panaghiusa taliwala sa mga Kristohanon.”
Kining madasigong mga proklamasyon napukaw tungod sa pagpirma sa Official Common Statement niadtong Oktubre 31, 1999, sa Augsburg, Alemanya, nga naglig-on sa Joint Declaration on the Doctrine of Justification. Ang oras ug dapit sa okasyon maayong pagkapili. Giingon nga niadtong Oktubre 31, 1517, gilansang ni Martin Luther ang iyang 95 ka thesis diha sa pultahan sa simbahang kastilyo sa Wittenberg, nga maoy nagpasugod sa Protestanteng Repormasyon. Siyempre, ang Augsburg mao ang dapit diin gipresentar sa mga Lutherano niadtong 1530 ang ilang paninugdang doktrina, ang Augsburg Confession, diin gisalikway sa Katolikong Iglesya, nga miresulta sa dili mahusay nga paglinay-anay tali sa Protestantismo ug sa Katolisismo.
Ang Joint Declaration ba maoy usa ka dakong lakang sa pagbuntog sa panagbahinbahin sa iglesya, sumala sa gipangangkon niini? Dili tanang partido nagtuo nga mahitabo kini. Kapin sa 250 ka Protestanteng mga teologo mipirma ug kontra nga petisyon, nga nagpasidaan batok sa posibleng pagdaog sa Katolikong Iglesya. Ang mga Protestante naglagot usab sa dihang ang Katolikong Iglesya mideklarar ug linain nga indulhensiya alang sa tuig 2000, ang mismong batasan nga maoy hinungdan sa paglinay-anay mga 500 ka tuig kanhi. Ug sanglit pareho nga balido gihapon ang Augsburg Confession ug ang tubag sa Katoliko pinaagi sa Konsilyo sa Trent, ang panaghiusa imposibleng maangkon.
Ang panagbahinbahin ug panagbingkil sulod sa Kakristiyanohan mas dako kay sa mahusay nianang pagpirma ug bisan unsang deklarasyon. Dugang pa, ang panaghiusa sa pagtuo posible lamang nga maangkon kon ang mga pagtulon-an lig-ong gipasukad sa Pulong sa Diyos, ang Bibliya. (Efeso 4:3-6) Inay kay makigkompromiso, ang tinuod nga panaghiusa magsumikad sa pagkat-on ug pagbuhat kon unsay gipangayo sa Diyos kanato. “Ang tanang mga katawhan, sa ilang bahin, magalakaw ang tagsatagsa sa ngalan sa iyang diyos,” mipahayag ang matinumanong manalagnang si Miqueas, “apan kita, sa atong bahin, magalakaw sa ngalan ni Jehova nga atong Diyos hangtod sa panahong walay tino, bisan hangtod sa kahangtoran.”—Miqueas 4:5.
[Picture Credit Line sa panid 32]
© Ralph Orlowski/REUTERS/Archive Photos