“Usa ka Natagong Kapeligrohan sa Panglawas sa Publiko”
ANG makapakurat nga un-tersiya sa mga adultong tiggamit sa Internet sa Tinipong Bansa nakasusi na sa pipila ka matang sa website sa sekso, sumala sa gibutyag sa bag-ong surbi bahin sa sekso sa Internet. Ang dakong gidaghanon sa mga tawo karon nagpadaog sa ilang mga pangagda sa sekso pinaagi sa Internet. “Kini maoy usa ka natagong kapeligrohan sa panglawas sa publiko nga kusog nga nagauswag, sa bahin, tungod kay diyutay ra kaayo ang nag-isip niini nga kapeligrohan o seryosong nagtagad niini,” nag-ingon si Dr. Al Cooper, ang sikologo nga naghimo sa maong surbi.
Kinsa ba ang ilabinang nameligro sa maong sekso sa Internet? “Kadtong mga tiggamit kansang seksuwalidad tingali napugngan ug nalimitahan sa tibuok nilang kinabuhi” apan “sa kalit nakakaplag ug walay limiteng suplay sa kahigayonan maylabot sa sekso” diha sa Internet, nag-ingon si Dr. Cooper.
Kadaghanan niadtong nagkanunayan sa website sa sekso, bisan pa niana, nag-isip sa maong buhat nga dili makadaot. Tinuod kaha? Sama sa usa ka giyanon sa droga nga naanad na sa droga nga niini siya nagiyan, daghang giyanon sa sekso sa Internet mangitag labaw pa bahin sa sekso diha sa Internet aron sa pagtagbaw sa ilang mga tinguha. Sa pagkatinuod, ilang gipameligro bisan ang ilang trabaho ug ang ilang relasyon sa ilang kapikas!
Apan, alang niadtong buot magpahimuot sa Diyos adunay dugang hinungdan nga likayan ang pagsusi sa mga website sa sekso diha sa Internet. Ang Pulong sa Diyos nagtambag: “Busa, patya ang inyong mga sangkap sa lawas nga anaa sa yuta maylabot sa pakighilawas, kahugawan, seksuwal nga gana, makadaot nga tinguha, ug hakog nga pangibog, nga maoy idolatriya. Tungod sa maong mga butang ang kapungot sa Diyos moabot.” (Colosas 3:5, 6) Aron ‘patyon ang iyang mga sangkap sa lawas’ maylabot sa mahugaw nga seksuwal nga gana, kinahanglang ugmaron sa usa ka tawo ang lig-on nga gugma kang Jehova nga Diyos. (Salmo 97:10) Kon makaplagan niya ang iyang kaugalingon nga nahaylo sa sekso diha sa Internet nga maoy usa ka kapeligrohan sa panglawas sa publiko, angay niyang palig-onon ang iyang gugma kang Jehova pinaagi sa pagtuon sa Pulong sa Diyos, ang Bibliya. Ang maayong pakig-uban sa mga Saksi ni Jehova sa lokal nga Kingdom Hall makatabang ug dako sa usa ka tawo nga lig-onon ang iyang determinasyon nga pahimut-an ang Diyos.