‘Pasalamati ang mga Saksi ni Jehova Tungod sa Relihiyosong Kagawasan’

“SA DILI pa nimo sirhan sa pultahan ang usa ka Saksi ni Jehova,” matod sa usa ka artikulo diha sa mantalaang USA Today, “hunong una aron palandongon ang makauulawng paglutos nga ilang giantos sa dili pa kaayo dugay, ingon man ang dako kaayong naamot nila sa mga kagawasang ginapahimuslan natong tanan gumikan sa Unang Pag-amenda.” Ang mga Saksi ni Jehova gilutos sa Tinipong Bansa sulod sa katuigang 1940 tungod kay, apil sa uban pang mga butang, nagdumili sa pagsaludar sa bandera.—Exodo 20:4, 5.

Mga 30 ka kaso nga naglangkit sa mga Saksi ni Jehova ang gipasaka ngadto sa Korte Suprema sa T.B. sa lima-ka-tuig nga yugto tali sa 1938 ug 1943. Ang artikulo nag-ingon: “Ang mga Saksi kanunayng magpasaka ug hinungdanong mga isyu nga naglangkit sa Unang Pag-amenda nga si Huwes Harlan Fiske Stone misulat, ‘Ang mga Saksi ni Jehova angayng gasahan tungod sa tabang nga ilang nahatag sa pagsulbad sa mga kaso bahin sa sibil nga mga kagawasan.’”

Busa, sa hapit na ang paniklop niini ang artikulo nag-ingon: “Ang tanang relihiyon kinahanglang magpasalamat sa mga Saksi ni Jehova tungod sa pagpadako pa sa [relihiyosong] kagawasan.”

[Picture Credit Lines sa panid 32]

Tinukod sa luyo: Letrato nga gikuha ni Josh Mathes, Collection of the Supreme Court of the United States; ubos sa wala, mga huwes: Collection of the Supreme Court of the United States