“Adlaw sa Relihiyosong Pagkamatinugoton”

NAIKAG tungod sa pakighisgot niya sa una uban sa mga Saksi ni Jehova, ang prinsipal sa usa ka eskuylahan sa Polandia migahin ug “Adlaw sa Relihiyosong Pagkamatinugoton” sa iyang eskuylahan. Siya misugyot nga ang mga boluntaryo taliwala sa mga estudyante—mga Katoliko, Budhista, ug mga Saksi ni Jehova—mag-andam ug mugbong mga presentasyon aron masayod ang ubang mga estudyante bahin sa ilang mga tinuohan ug mga tulumanon. Tulo ka tin-edyer nga mga Saksi ni Jehova ang miboluntaryo dihadiha.

Pag-abot sa maong adlaw, ang unang misulti mao ang 15-anyos nga si Malwina. Mao kini ang usa ka bahin sa iyang gisulti: “Daghan kaninyo ang nakaila kanamo sa wala pa kami magsugod sa pagtungha niini nga eskuylahan tungod kay naduaw na namo kamo sa inyong mga puy-anan. Basin natingala kamo kon nganong padayon kami nga nagabuhat niana. Tungod kana kay kami nagsundog sa panig-ingnan ni Jesu-Kristo, ang Magtutukod sa Kristiyanidad. Siya nagsangyaw sa maayong balita sa Gingharian sa Diyos bisan diin makaplagan ang mga tawo. Mao usab kini ang gibuhat sa mga apostoles ug sa ubang unang mga Kristohanon. Diha sa daghang dapit, ang mga Saksi ni Jehova nag-antos sa malisod nga mga pagsulay sa pagtuo, apan malipayon kami tungod kay dinhi sa atong eskuylahan kami nagtagamtam ug kalinaw, nga niana kamong tanan dunay naamot. Nagpasalamat kami kaninyo tungod niana!”

Sa pagtapos sa iyang presentasyon, si Malwina nag-ingon: “Dunay laing rason kon nganong moduaw kami sa inyong balay. Nahingawa kami kaninyo. Ang Bibliya nag-ingon nga sa dili madugay ang katawhan makasinati ug mga hitabo nga mouyog sa kalibotan. Busa sa sunod higayon nga manuktok kami sa inyong pultahan, palihog paggahin ug panahon nga mamati. Buot namong suginlan kamo kon sa unsang paagi kita magkaubang mabuhi nga walay kataposan sa usa ka paraiso sa yuta.”

Ang sunod nga mamumulong mao si Mateusz, nga 15-anyos usab. Gisuginlan ni Mateusz ang iyang mamiminaw nga sulod sa daghang tuig, ang mga Saksi ni Jehova nakagamit ug lainlaing mga paagi sa pagpakaylap sa maayong balita. Pananglitan, sa 1914—panahon sa mga pelikulang walay tingog—gipasalida sa mga Saksi ang “Photo-Drama of Creation,” usa ka sine ug pasundayag sa eslayd nga naglakip ug tingog nga gidungan pagpatokar.

Gihisgotan ni Mateusz ang papel sa radyo sa pagpakaylap sa mensahe sa Gingharian ug dayon gihubit ang talagsaong de-kompiyuter nga multilanguage electronic phototypesetting system (MEPS) nga gigama sa mga Saksi ni Jehova. Giasoy usab niya kon sa unsang paagi ang mga Saksi ni Jehova nakatabang sa paghatag ug impormasyon sa mga doktor bahin sa mga pamaagi sa walay-dugo nga pagtambal. “Karon, ang inila nga Polakong mga mananambal dunay paborableng komento bahin sa among baroganan ug nagpasiugda nga matag tuig nagkadaghan ang dili-Saksi nga mga pasyenteng gioperahan nga wala mogamit ug dugo,” miingon siya.

Mihinapos si Mateusz pinaagi sa pagsugilon bahin sa pagpanukod ug mga Kingdom Hall ug miingon: “Buot ba ninyong moadto sa among Kingdom Hall? Walay bayad ang pagtambong, ug walay pagpangolekta ug kuwarta.” Sa paghisgot bahin sa kombensiyonanan sa Sosnowiec, si Mateusz miingon: “Kinahanglang makita ninyo kining dako ug praktikal-ug-disenyo nga tinukod. Nganong dili ta magkuyog sa pag-adto didto? Duna kamiy sugyot, ug sultihan kamo sa atong higala nga si Katarzyna bahin niini.”

Sunod, ang 15-anyos nga si Katarzyna maikagong miingon: “Gidapit kamo sa pag-adto sa Sosnowiec alang sa distritong kombensiyon sa mga Saksi ni Jehova. Pagahisgotan ang mga ulohan nga may kalabotan sa mga batan-on.” Gihisgotan usab ni Katarzyna ang pangunang ginasaulog sa mga Kristohanon—ang Memoryal sa kamatayon ni Jesu-Kristo. Iyang gidasig ang iyang mga mamiminaw: “Sa milabayng tuig kapin sa 14 milyones ka tawo sa tibuok kalibotan ang mitambong niana nga pagsaulog. Nganong dili kamo moduyog kanamo sa sunod higayon?”

Human sa ilang mga presentasyon, gitanyag ni Malwina, Mateusz, ug Katarzyna ngadto sa mga magtutudlo ang librong Mga Saksi ni Jehova—Mga Magmamantala sa Gingharian sa Diyos lakip ang duha ka videocassette nga naghisgot bahin sa mga tinuohan ug mga kalihokan sa mga Saksi ni Jehova.a Mapasalamaton kining gidawat sa mga magtutudlo ug misaad sila nga gamiton kini sa mga klase sa kasaysayan.

Pagkatapos sa sesyon, gitugtog sa 12-anyos nga si Martyna alang sa tanang nanambong ang awit nga nag-ulohang “Salamat, Jehova.” Kining batan-ong mga Saksi ‘nakabaton ug kaisog pinaagi sa ilang Diyos’ ug nakahatag ug maayong pamatuod. (1 Tesalonica 2:2) Pagkamaayo kaayong panig-ingnan alang sa batan-ong mga Saksi bisan diin!

[Footnote]

[Hulagway sa panid 26]

Si Katarzyna nagpili ug mga teksto alang sa presentasyon

[Hulagway sa panid 26]

Si Malwina nag-andam sa presentasyon pipila ka adlaw sa wala pa kini ihatag diha sa eskuylahan