Si Henry VIII ug ang Bibliya
SA IYANG librong History of the English-Speaking Peoples (Tomo 2), si Winston Churchill misulat: “Sa natad sa relihiyosong pagtuo ang Repormasyon nagpahinabog dakong kausaban. Ang Bibliya niining panahona nahimong bag-ong dinawat nga tuboran sa ekspertong tambag nga nag-impluwensiya sa daghang natad. Ang mga tigulang naghunahuna nga ang Balaang mga Sinulat peligroso diha sa mga kamot sa walay mga kabangkaagan ug kinahanglang basahon lamang sa mga pari.”
Ang asoy nagpadayon: “Ang kompletong pinatik nga mga Bibliya, nga gihubad ngadto sa Iningles ni Tyndale ug Coverdale, unang mitungha sa ulahing bahin sa tinghunlak sa 1535, ug ubay-ubayng edisyon na ang ginapatik. Ang Gobyerno nag-awhag sa klero nga idasig ang pagbasa sa Bibliya.” Human sa daghang siglo nga walay-kabangkaagan sa Bibliya, ang Inglaterra nasinati na sa Bibliya, apan tungod kini sa gobyerno ni Henry VIII inay kay sa iglesya.a
“Ingong dugang kaparotan sa mga tawo nga nagpabilin sa kanhing mga tulumanon ug mga hunahuna bahin sa Bibliya ang Gobyerno nagsugo didto sa Paris sa pag-imprenta ug daghan kaayong Iningles nga mga Bibliya nga mas nindot kay sa bisan unsang kanhing mga edisyon, ug sa Septiyembre 1538 nagmando nga ang tanang paroko sa nasod kinahanglang mopalit sa kinadak-ang tomo sa Bibliya sa Iningles, nga ipahimutang diha sa matag simbahan, diin ang mga parokyano dali ra kaayong makaduol ug makabasa niana. Unom ka kopya ang gibutang diha sa St Paul’s, sa Siyudad sa London, ug daghan ang nanghugop ngadto sa katedral kada adlaw aron mobasa niini, ilabina, giingnan kita, sa dihang duna silay makita nga tawo nga lanog ug tingog aron mobasa ug kusog.”
Ikasubo, diha sa daghang nasod, daghan ang wala magpahimulos sa ilang pribilehiyo sa pagbasa kanunay sa Bibliya. Makapabalaka kaayo kini, tungod kay ang Bibliya lamang ang “inspirado sa Diyos ug mapuslanon sa pagpanudlo, sa pagpamadlong, sa pagpanul-id sa mga butang, sa pagdisiplina diha sa pagkamatarong.”—2 Timoteo 3:16.
[Footnote]
a Si Haring Henry VIII nagmando sa Inglaterra gikan sa 1509 ngadto sa 1547.
[Picture Credit Line sa panid 32]
Henry VIII: Painting in the Royal Gallery at Kensington, from the book The History of Protestantism (Vol. I)