Sa Dihang Maalamon ang Pagdagan

KINAIYAHAN na sa kalibotan karon ang espiritu sa pagpaisog-isog ug pagkamasukolon o ang mga tentasyon. Ang usa ka tawo nga mokalagiw sa usa ka kahimtang kasagarang isipon nga huyang o talawan. Mahimo pa gani nga bugalbugalan siya.

Apan, klarong gipakita sa Bibliya nga dunay mga higayon nga ang pagdagan maoy maalamon ug nagpakitag kaisog. Sa pagpamatuod niini, sa wala pa niya sugoa ang iyang mga tinun-an sa pagsangyaw, gisultihan sila ni Jesu-Kristo: “Sa dihang kamo pagalutoson sa usa ka siyudad, kalagiw ngadto sa lain.” (Mateo 10:23) Oo, ang mga tinun-an ni Jesus kinahanglang maningkamot sa pagkalagiw gikan sa ilang mga maglulutos. Kinahanglang dili sila mangampanya ug relihiyosong pagpakiggubat, nga mamugos sa pagkombertir sa uban. Sila nagdala ug mensahe sa pakigdait. (Mateo 10:11-14; Buhat 10:34-37) Busa imbes masuko, ang mga Kristohanon gisugo sa pagkalagiw, magpalayo gikan sa manghagit. Niining paagiha, ilang mahuptan ang maayong tanlag ug ang ilang bililhong relasyon kang Jehova.—2 Corinto 4:1, 2.

Ang usa ka pananglitan sa sukwahi nga kahimtang nasulat diha sa basahong Proverbio sa Bibliya. Kini nag-asoy bahin sa usa ka batan-ong lalaki nga, imbes mokalagiw sa tentasyon, migukod hinuon sa usa ka pampam “sama sa usa ka torong baka nga nagapadulong sa pagkaihaw.” Ang resulta? Kadaot tungod sa pagpadaog sa tentasyon nga naglangkit sa iyang kinabuhi mismo.—Proverbio 7:5-8, 21-23.

Komosta man kon ikaw makasugamak ug tentasyon sa pagbuhat ug seksuwal nga imoralidad o makaatubang ug uban pang peligrosong kahimtang? Sumala sa Pulong sa Diyos, ang nahiangayng aksiyon mao gayod ang pagkalagiw, ang pagpalayo dihadiha gikan sa maong kahimtang.—Proverbio 4:14, 15; 1 Corinto 6:18; 2 Timoteo 2:22.