“Husto Ka, Makalilipay Gayod ang Kinabuhi!”

GUSTO mo bang mahibaloan ang tinuod nga kahulogan sa kinabuhi? Gitabangan sa 18-anyos nga si Magdalena, nga usa sa mga Saksi ni Jehova nga taga-Szczecin, Polandia, ang iyang klasmet sa hayskul nga si Katarzyna nga mahibaloan kana. Giangkon ni Katarzyna nga siya ateyista, apan sa dihang giestoryahan siya ni Magdalena bahin sa Bibliya, siya nagpakitag tinuod nga interes.

Bisan tuod ug nagustohan ni Katarzyna ang gipaambit ni Magdalena gikan sa Bibliya, dili gayod niya kini madawat sa bug-os. Samtang nakig-estorya siya kang Magdalena bahin sa tinuod nga mga higala, si Katarzyna kas-a miingon: “Duna kay Bibliya; nahibalo ka kon unsang mga prinsipyo ang angayng sundon ug kon asa makakaplag ug tinuod nga mga higala. Apan komosta man kadtong, sa pagkakaron, dili pa makadawat sa maong mga prinsipyo?”

Usa ka dakong kausaban ang nahitabo sa dihang miadto si Katarzyna sa London, Inglaterra. Miduaw siya sa sangang buhatan sa mga Saksi ni Jehova didto, ug natandog siya sa kaayo nga gipakita kaniya. Iyang nagustohan ang yanong mga buhat sama sa pag-abli sa pultahan alang niya ug sa gipakitang tinuod nga interes sa kon unsay iyang gisulti.

Sa pag-abli sa klase sa Septiyembre 2001, nakahukom si Katarzyna sa pagdawat ug regular nga pagtuon sa Bibliya. Gipalig-on niya ang iyang pagpabili sa mga prinsipyo sa Bibliya ug misugod sa pagpadapat niana diha sa iyang matag adlaw nga pagkinabuhi. Di pa dugay, misugid siya kang Magdalena, nga nag-ingon: “Gibati kong morag nagsugod ako ug usa ka bag-ong kinabuhi.” Gipadalhan usab niya si Magdalena ug mubong mensahe pinaagig cell phone: “Daghan kaayong salamat sa atong pagtuon karong adlawa! Husto ka, makalilipay gayod ang kinabuhi! Makapalipay ang pagkasayod kon kinsay angay natong pasalamatan alang niana.”