“Wala Kaayo Koy Nahibaloan Bahin sa Diyos”

“SULOD sa miaging tuig, ang mga Saksi ni Jehova nagduawan na kanako ug nagapaambit sa kahibulongang balita bahin sa Gingharian sa Diyos. Ako usa ka Katoliko sulod sa walo ka tuig, apan wala kaayo koy nahibaloan bahin sa Diyos. Sulod sa usa ka tuig lamang, daghan na akog nakat-onan,” nagsulat ang usa ka tawo nga taga-Kerala, India. “Nalipay kaayo ko sa pagkasayod nga Ang Bantayanang Torre gipatik diha sa 139 [karon 146] ka pinulongan,” siya mipadayon. “Makapahingangha nga ang mga tawo sa tanang pinulongan makahibalo sa mensahe bahin sa Diyos.”

Bisan tuod giangkon sa daghang pilosopo nga imposibleng mailhan ang Diyos, gipatin-aw ni apostol Pablo nga posible kana. Namulong sa usa ka grupo nga taga-Atenas, nga ang pipila kanila nagasimba diha sa usa ka halaran nga gipahinungod sa “Usa ka Diyos nga Wala Mailhi,” si Pablo miingon: “Kini nga sa kawalay-kahibalo inyong ginahatagan ug diyosnong pagkamahinalaron, kini ang akong ginamantala kaninyo. Ang Diyos nga naghimo sa kalibotan ug sa tanang butang diha niini . . . naghatag ngadto sa tanang tawo ug kinabuhi ug gininhawa ug tanang butang. Ug iyang gihimo gikan sa usa ka tawo ang tanang nasod sa katawhan, aron magpuyo ibabaw sa tibuok nawong sa yuta.”—Buhat 17:23-26.

Giawhag ni Pablo ang iyang mga mamiminaw sa pagpaningkamot nga makaila sa Maglalalang, tungod kay “siya dili halayo gikan sa matag usa kanato.” (Buhat 17:27) Ang mga Saksi ni Jehova malipay sa pagtabang kanimo nga makaila sa matuod nga Diyos ug sa iyang madanihong mga hiyas.