Ang Kataposang Panihapon—Unsa Kini?

UNSAY mosantop sa hunahuna kon imong madungog ang ekspresyon nga “kataposang panihapon”? Mahunahunaan sa daghang tawo ang gidayeg pag-ayong dibuho didto sa Milan, Italya, nga hinimo sa pintor nga si Leonardo da Vinci (1452-1519). Ang tinuod mao nga ang Kataposang Panihapon maoy popular nga tema sa mga magdidibuho, magsusulat, ug mga musikero latas na sa daghang siglo.

Apan, unsa ang Kataposang Panihapon, ug unsay kahulogan niini alang sa mga tawo nga nagkinabuhi karon? Diha sa mga ensiklopedia ug mga diksiyonaryo imong mabasa nga ang Kataposang Panihapon, nga gitawag usab ug Panihapon sa Ginoo, mao ang panihapon ni Jesu-Kristo uban sa iyang mga apostoles sa gabii una pa sa iyang haladnong kamatayon. Sanglit kataposang higayon na kadto nga manihapon si Jesus uban sa iyang matinumanong mga sumusunod, kadto sa naandan gitawag nga Kataposang Panihapon. Ug tungod kay gisugdan kadto ni Ginoong Jesu-Kristo mismo, mohaom ang ngalang Panihapon sa Ginoo.

Latas sa kasiglohan, daghan ang naghalad sa ilang kinabuhi alang sa ilang giisip nga mapuslanong mga kawsa. Ang uban niining maong mga kamatayon nakahatag ug kaayohan sa pipila ka tawo sulod sa usa ka yugto sa panahon. Apan, walay usa niining haladnong mga kamatayon, bisag unsa pa ka dalayegon, ang sama ka dakog kahulogan kon itandi sa kamatayon ni Jesu-Kristo. Dugang pa, walay kamatayon sa gubot nga kasaysayan sa mga tawo ang posibleng makapahinabog dako ug malungtarong epekto. Ngano?

Aron matubag kanang pangutanaha ug matabangan ka nga mahibaloan kon unsay kahulogan sa Panihapon sa Ginoo alang kanimo, ikaw among gidapit sa pagbasa sa sunod nga artikulo.