Ang mga Alagad sa Diyos Nahisamag mga Kahoy—Sa Unsang mga Paagi?
SA NAGHISGOT bahin sa usa ka tawo nga nalipay ug nagpadapat sa mga prinsipyo sa Bibliya diha sa iyang kinabuhi, ang salmista miingon: “Siya mahisama gayod sa usa ka kahoy nga natanom sa daplin sa kasapaan sa tubig, nga mobunga sa iyang panahon ug ang iyang mga dahon dili malaya, ug ang tanan nga ginabuhat niya magmalamposon.” (Salmo 1:1-3) Nganong haom kining maong pagtandi?
Ang mga kahoy mahimong mabuhi sa dugay kaayong panahon. Pananglitan, ang pipila ka kahoyng olibo sa rehiyon sa Mediteranyo gikaingon nga may usa ngadto sa duha ka libo ka tuig ang kagulangon. Sa susama, ang mga kahoyng baobab sa sentral Aprika taas kaayo ug edad, ug ang bristlecone pine sa California gituohan nga mga 4,600 ka tuig ang kagulangon. Sa usa ka lasang, ang dagkong mga kahoy kasagarang mapuslanon sa mga lugar nga gituboan niini. Pananglitan, ang tag-as nga mga kahoy makataganag landong nga makapanalipod sa gagmayng mga kahoy, ug ang mga dahon nga mangatagak gikan sa mga kahoy makapatambok sa yuta.
Ang kinatas-ang mga kahoy sa kalibotan sagad nga makaplagang duyog nga motubo diha sa kalasangan, diin ang kada kahoy nagpalig-on sa kada usa. Sanglit ang mga gamot niini naglambod sa usag usa, sa tingob ang daghang kahoy mahimong mas makasagubang ug maayo sa usa ka bagyo kay sa nag-inusarang kahoy diha sa kabalilihan. Ang dagkong sistema sa mga gamot makapaarang usab sa usa ka kahoy sa pagsuhop ug igong tubig ug mga sustansiya gikan sa yuta. Sa pipila ka kahimtang, ang mga gamot motidlom nga mas lalom kon itandi sa gitas-on sa kahoy, o ang mga gamot mas sangkad ang pagtubo kay sa gisangkaron sa mga dahon sa kahoy.
Si apostol Pablo mahimong nagtumong sa usa ka kahoy sa dihang iyang gisaysay nga ang mga Kristohanon kinahanglang “magpadayon sa paglakaw nga nahiusa [kang Kristo], nga gipagamot ug ginatukod diha kaniya ug ginapalig-on diha sa pagtuo.” (Colosas 2:6, 7) Sa pagkatinuod, ang mga Kristohanon makapabilin lamang nga malig-on sa pagtuo kon sila lig-ong nakagamot diha kang Kristo.—1 Pedro 2:21.
Sa unsang ubang mga paagi nga ang mga alagad sa Diyos mahimong ipakasama sa mga kahoy? Buweno, sama nga ang mga kahoy makadawat ug pagpaluyo gikan sa mga kahoy diha sa duol, sa ingon kadtong tanan nga magpabiling suod sa Kristohanong kongregasyon makadawat ug pagpaluyo gikan sa mga isigkamagtutuo. (Galacia 6:2) Ang matinumanon, hamtong nga mga Kristohanon, kay nakabaton ug sangkad nga espirituwal nga mga gamot, makatabang sa mga bag-ohan sa pagpabiling lig-on sa pagtuo, bisan atubangan sa samag-bagyo nga pagsupak. (Roma 1:11, 12) Ang bag-ohang mga Kristohanon molambo diha sa mapanalipdanong “landong” sa mas eksperyensiyadong mga alagad sa Diyos. (Roma 15:1) Ug ang tanang membro sa Kristohanong kongregasyon sa tibuok kalibotan makapahimulos sa makapalig-ong kalan-on nga gitagana sa “dagkong kahoy sa pagkamatarong,” ang dinihogang nanghibilin.—Isaias 61:3.
Pagkamakapahinam nga ang tanang alagad sa Diyos adunay palaaboton nga makatagamtam sa katumanan sa saad nga makaplagan sa Isaias 65:22, nga nag-ingon: “Ang mga adlaw sa akong katawhan mahisama sa mga adlaw sa usa ka kahoy.”
[Picture Credit Line sa panid 28]
Godo-Foto