Ang Tinguha sa Katawhan sa Pagpahimuot sa Diyos

“ANG pagtuo maylabot sa gahom sa Diyos sa pagkontrolar ug paglalang maoy bahin gayod sa bisan unsang tawhanong katilingban. Tinuod usab kana bisan diha sa mga katilingban nga dili motuo ug Diyos.” Mao kanay giingon ni John Bowker diha sa iyang librong God—A Brief History. Sa usa ka paagi o sa lain, ang tinguha sa pagkaplag sa Diyos ug pagbaton sa iyang pabor maoy komon nga bahin sa kinaiya sa tawo. Sa tibuok kalibotan, daghan ang may sinserong tinguha sa pagpahimuot sa Diyos. Siyempre, ang ilang paagi sa paghimo niini managlahi depende sa ilang mga tinuohan.

Ang uban nagtuo nga ang gikinahanglan lamang aron maangkon ang pabor sa Diyos mao ang pagkinabuhing matarong. Ang uban mibati nga ilang maangkon ang pag-uyon sa Diyos pinaagi sa paghimog mga buhat sa kaluoy alang sa mga kabos. Dugang pa, ang relihiyosong mga seremonyas ug mga rituwal maoy hinungdanon alang sa milyonmilyong tawo.

Sa laing bahin, duna usay nagtuo nga ang Diyos dili nila maabot—sobra ra ka layo o puliki kaayo sa ubang mga butang nga dili na makatagad sa ordinaryong mga tawo. Ang pilosopo nga si Epicurus sa karaang Gresya gikataho nga nagtuo nga ‘ang mga diyos layo kaayo nga dili gayod makahimog maayo o daotan nganhi kanato.’ Bisan pa niana, daghan nga nagbaton sa maong pagtuo maoy mga relihiyoso. Lagmit nga maghalad pa gani ang uban ug maghimog mga rituwal sa paglaom nga mapahimut-an ang patay nilang mga katigulangan.

Unsay imong hunahuna? Mamatikdan ba gayod sa Diyos ang atong mga paningkamot nga maangkon ang iyang pabor? Posible ba nga matandog nato ang kasingkasing sa Diyos ug mapahimut-an siya?

[Picture Credit Line sa panid 2]

COVER: Courtesy of ROE/Anglo-Australian Observatory, photograph by David Malin