Kon Unsaon Pagbaton ug Taas ug Malipayon nga Kinabuhi
“GUSTO natong tanan ug taas nga kinabuhi; apan walay usa kanato nga gustong matigulang.” Mao kanay giingon sa usa ka panultihon. Daghang edarang mga tawo nga hapit nang moretiro ang maikagong nagpaabot nga makabaton ug dugang libreng panahon ug mas diyutayng mga responsabilidad. Apan, nahadlok sila nga mawad-ag tumong sa kinabuhi ug mahimong walay pulos. Nabalaka usab sila bahin sa pag-inusara, kawalay-kalipay, ug nagkaluyang panglawas.
Nan, unsa ang sekreto sa malipayong kinabuhi? Ang maayong mga higala ug usa ka mahigugmaong pamilya makaamot sa kalipay sa mga batan-on ug tigulang. Apan ang mahimo sa uban alang sa usa ka edarang tawo dili mao ang hinungdanon. Ang labawng hinungdanon maoy kon unsa ang mahimo sa usa ka edarang tawo alang sa uban.
Usa ka dugayng pagtuon sa 423 ka tigulang nga magtiayon nagpakita nga “ang atong pagkamatinabangon ngadto sa uban lagmit mopalugway sa atong kinabuhi.” Si Stephanie Brown, kinsa nagdumala sa pagtuon, misaysay: “Kini nga mga kaplag nagpakita nga ang atong madawat gikan sa atong relasyon sa uban dili mao ang makahatag kanatog dakong kaayohan; kini maoy kon unsa ang atong ikahatag.” Ang maong paghatag naglakip sa pagtabang sa uban sa mga buluhaton sa balay, pagbantay sa mga bata, pagpamalit, pagtaganag transportasyon, o pagpamati niadtong gustong makig-estorya.
Mga 2,000 ka tuig kanhi, si Jesu-Kristo miingon: “Adunay labaw nga kalipay sa paghatag kay sa pagdawat.” (Buhat 20:35) Ang pagbaton ug taas ug malipayon nga kinabuhi wala magsumikad sa daghang salapi sa bangko o sa mga tambal ug diyeta nga mopalangan sa proseso sa pagkatigulang. Hinunoa, kini naggikan sa pagpabilin nato nga aktibo ug paghatag sa atong panahon, kusog, ug kabaskog aron sa pagpatugob sa kinabuhi sa uban.
Bisan pa niana, labaw pa niini ang gikinahanglan aron kita dili na matigulang, magkasakit, ug mamatay. Ang Gingharian sa Diyos lamang ang makawagtang sa maong mga butang. Ilalom sa pagmando niini, ang sakit mahanaw na ug bisan “ang kamatayon mawala.” (Pinadayag 21:3, 4; Isaias 33:24) Sa pagkatinuod, ang masinugtanong mga tawo mabuhi nga malipayon sa walay kataposan diha sa usa ka paraisong yuta. (Lucas 23:43) Ang mga Saksi ni Jehova malipay sa pagpaambit sa uban niining binase-sa-Bibliya nga paagi sa pagbaton ug taas ug malipayon nga kinabuhi.