Usa ka Hitabo nga Angayng Hinumdoman

UNSA kining hitaboa? Kini mao ang kamatayon sa usa ka tawo mga 2,000 ka tuig na kanhi. “Itugyan ko ang akong kalag, aron nga madawat ko kini pag-usab,” matod niya. “Walay tawo nga nagkuha niini gikan kanako, apan ako nagtugyan niini sa akong kaugalingong pagbuot.” (Juan 10:17, 18) Ang maong tawo mao si Jesu-Kristo.

Gisugo ni Jesus ang iyang mga sumusunod sa pagsaulog sa Memoryal sa iyang haladnong kamatayon. Ang maong okasyon gitawag usab nga “panihapon sa Ginoo.” (1 Corinto 11:20) Ang Memoryal nga gisugdan ni Jesus agig paghinumdom sa iyang kamatayon pagasaulogon sa mga Saksi ni Jehova ug sa ilang mga higala sa Huwebes, Marso 24, 2005, human sa pagsalop sa adlaw.

Ipatin-aw sa usa ka pakigpulong nga gibase sa Bibliya kon unsay kahulogan sa tinapay nga walay lebadura ug sa pula nga bino nga gamiton sa maong okasyon. (Mateo 26:26-28) Tubagon usab sa maong pakigpulong ang mga pangutana sama sa: Unsa ka subsob angayng saulogon sa mga Kristohanon kini nga okasyon? Kinsa ang takos nga makig-ambit sa mga emblema sa tinapay ug bino? Kinsay makabenepisyo sa kamatayon ni Jesus? Pinaagi niining importante nga kasaulogan, ang tanan matabangan sa pagsabot sa katuyoan sa kinabuhi ug kamatayon ni Jesus.

Ikaw mainitong gidapit sa Memoryal sa kamatayon ni Jesus. Palihog pangutan-a ang mga Saksi ni Jehova sa imong dapit alang sa eksaktong dapit ug oras sa maong pagsaulog.