Gigantihan ang Usa ka Layo nga Panaw

SA Demokratikanhong Republika sa Congo, duha ka magsoong babaye nagtaho nga sila mihimog layo nga panaw agi sa nagusbat-sa-gubat nga dapit aron motambong sa “Himayaa ang Diyos” nga Distritong Kombensiyon sa Lisala. Gawas sa espirituwal nga instruksiyon ug Kristohanong panag-ubanay nga gilaoman nilang matagamtam sa maong kombensiyon, naghinamhinam usab sila nga mahimamat ang mga hawas gikan sa sangang buhatan sa mga Saksi ni Jehova sa Kinshasa. Tungod sa gubat-sibil sa maong nasod, sila wala makakita ug hawas gikan sa sanga sulod sa daghang katuigan, ug buot nilang pahimuslan kini nga kahigayonan.

Sakay sa usa ka baroto, ang duha ka magsoon migikan sa ilang lugar sa Basankusu padulong sa Lisala, usa ka panaw nga may gilay-on nga mga 300 kilometros agi sa kalasangan ug duha ka suba. Gidangtag tulo ka semana ang ilang panaw. Sanglit sila anaa sa bug-os-panahong ministeryo, nga ang usa nakaalagad na ug 3 ka tuig ug ang lain 19 ka tuig, gipahimuslan nila kining panawa aron isangyaw ang maayong balita sa Gingharian. Migugol silag 110 ka oras sa pagsangyaw sa mga tawo nga ilang nahibalag sa dalan, nga nakapahimutang ug 200 ka tract ug 30 ka magasin.

Diha sa suba, sila kinahanglang moagi sa dapit nga kasagarang adunay mga hippo ug buaya. Sila dili mahimong monabigar sa suba sa dihang gabii na—peligroso gayod kini! Nakaagi usab sila ug daghang tsekpoint sa militar.

Bisan tuod layo ug kapoy ang maong panaw, ang magsoon nalipay sa paghimo niadto. Sila mapasalamaton ug malipayon gayod tungod kay sila nakatambong sa kombensiyon sa Lisala. Ang ilang mga kasingkasing nagdilaab sa kasibot alang sa kamatuoran, ug sila nadasig gayod sa pagpakig-uban sa 7,000 ka igsoong mga lalaki ug babaye nga nanambong. Human sa kombensiyon, gisagubang na usab nila ang kalisod sa pagbiyahe balik sa ilang dapit, diin nakaplagan nila ang ilang pamilya nga luwas ug buhi.