Mga Bag-ong Membro sa Nagamandong Lawas
SA Miyerkoles sa buntag, Agosto 24, 2005, ang pamilyang Bethel sa Tinipong Bansa ug Canada, nga gikonektar sa video, nakadungog ug makapalipayng pahibalo. Sugod sa Septiyembre 1, 2005, duha ka bag-ong membro—si Geoffrey W. Jackson ug Anthony Morris III—ang madugang sa Nagamandong Lawas sa mga Saksi ni Jehova.
Si Brader Jackson nagsugod pagpayunir sa Pebrero 1971 sa Tasmania, usa ka isla nga estado sa Australia. Sa Hunyo 1974, siya naminyo kang Jeanette (Jenny). Di pa dugay human niana, sila gitudlo sa pag-alagad ingong mga espesyal payunir. Gikan sa 1979 hangtod 2003, sila nag-alagad ingong mga misyonaryo sa Tuvalu, Samoa, ug Fiji—isla nga mga nasod sa Habagatang Pasipiko. Sa didto pa sila sa maong mga isla, si Brader ug Sister Jackson nakatabang usab ug dako sa paghubad sa literatura sa Bibliya. Sukad sa 1992, si Brader Jackson nag-alagad ingong membro sa Komite sa Sanga sa Samoa, ug sukad sa 1996, sa Komite sa Sanga sa Fiji. Sa Abril 2003, siya ug si Jenny nahimong bahin sa pamilyang Bethel sa Tinipong Bansa ug nagsugod sa pagtrabaho sa Translation Services Department. Wala madugay human niana, si Brader Jackson giasayn sa pagtabang sa Komite sa Pagtudlo sa Nagamandong Lawas.
Si Brader Morris nagpayunir niadtong 1971 sa Tinipong Bansa. Sa Disyembre nianang tuiga, siya naminyo kang Susan, ug sila nagpadayon sa pagpayunir sulod sa duolan sa upat ka tuig hangtod natawo ang ilang unang anak lalaki, si Jesse. Wala madugay, kini nasundan ug laing anak lalaki, si Paul. Si Brader Morris mibalik pagpayunir niadtong 1979. Ang iyang asawa miduyog kaniya sa dihang nag-eskuyla na ang mga bata. Ang pamilya nag-alagad diin dako ang panginahanglan sa Rhode Island ug North Carolina, sa Tinipong Bansa. Sa North Carolina, si Brader Morris nag-alagad ingong kapuling magtatan-aw sa sirkito, ug ang iyang mga anak nagregular payunir. Sa edad nga 19 anyos, si Jesse ug Paul gidapit sa pag-alagad sa sanga sa Tinipong Bansa. Kasamtangan, si Brader Morris nagsugod pag-alagad ingong magtatan-aw sa sirkito. Dayon, pagka-2002 siya ug si Susan gidapit sa Bethel, nga magsugod sa ilang bag-ong asaynment sa Agosto 1. Si Brader Morris nagtrabaho sa Service Department sa Patterson ug sa ulahi mitabang sa Komite sa Pag-alagad sa Nagamandong Lawas.
Lakip niining duha ka bag-ong membro, ang Nagamandong Lawas naglangkob kang C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; ug D. Sydlik. Ang tanang membro sa Nagamandong Lawas maoy dinihogang mga Kristohanon.