“Ang Kinamaayohang Pagtapos nga Akong Mahanduraw”

ANG usa ka magtutudlo sa hayskul sa Espanya misulat: “Sulod sa kapin sa usa ka gatos ka tuig, ang mga Saksi ni Jehova nagpasundayag ug tinuod nga panaghiusa, walay-ikasaway nga pagkamatinud-anon ug, labaw sa tanan, dili-matarog nga pagtuo.” Unsay nagtukmod niini nga magtutudlo—nga nag-angkong ateyista—sa pagsulti nianang mga pulonga?

Nagsugod ang tanan sa dihang si Noemí, usa ka estudyante sa hayskul ug usa sa mga Saksi ni Jehova, giasaynan sa pagsulat ug usa ka komposisyon ingong bahin sa kataposang pasulit sa iyang pagtuon sa hayskul. Siya mihukom sa pagtagik sa temang “Ang Purpurang mga Trayanggulo Ilalom sa Pagmando sa Nazi.”

Nganong gipili man niya kanang temaha? Si Noemí nagpatin-aw: “Tungod kay basahon man sa usa ka magtutudlo ang akong komposisyon, ako naghunahuna nga magamit nako ang maong kahigayonan sa pagpamatuod kaniya. Ang asoy kon giunsa paghupot sa mga Saksi ni Jehova sa Alemanya ang ilang mga prinsipyo nakatandog pag-ayo kanako. Ako nagtuo nga makadayeg usab niini ang uban.”

Ang komposisyon ni Noemí nakaapektar sa mas daghang tawo kay sa iyang gidahom. Sa Oktubre 5, 2002, ang iyang komposisyon nakadaog diha sa usa ka nasodnong kompetisyon sa panukiduki bahin sa siyensiya ug humanities. Ang mga ganti nianang maong kompetisyon gihatag sa usa ka hurado nga gilangkoban sa 20 ka propesor gikan sa inilang mga unibersidad sa Espanya.

Ang ministro sa edukasyon sa Espanya nga si Pilar del Castillo maoy nagtunol kang Noemí sa iyang ganti. Gipahimuslan ni Noemí ang higayon nga hatagan ang ministro ug kopya sa video nga Jehovah’s Witnesses Stand Firm Against Nazi Assault. Ang ministro nalipayng midawat sa gasa.

Sa lungsod sa Manresa, nga maoy gipuy-an ni Noemí, ang lokal nga mantalaan naghisgot sa iyang akademikong kalamposan ug nagrepaso sa unod sa iyang komposisyon. Sa kasamtangan, ang prinsipal sa ilang eskuylahan nangayog kopya sa iyang komposisyon aron ilakip kini sa programa sa pagsaulog sa ika-75 nga anibersaryo sa eskuylahan.

“Mao kini ang kinamaayohang pagtapos nga akong mahanduraw sa akong pagtuon sa hayskul,” matod pa ni Noemí. “Ako nalipay kaayo sa dihang akong nabasa ang gisulat sa akong magtutudlo, si G. Jorge Tomás Calot, ingong bahin sa iyang introduksiyon sa akong report:

“‘Ako usa ka ateyista, apan buot nakong makombinsir sa bug-os sa paglungtad niining Supremong Persona, nga nagdasig diha sa iyang mga magsisimba sa tiunay kaayong “gugma sa silingan.”’”