Usa ka Panig-ingnan sa Pagkamatinud-anon

SI Nelma, nga nagtrabaho ingong tig-areglar ug buhok sa Cruzeiro do Sul, Brazil, nakaatubang ug pagsulay sa iyang Kristohanong integridad di pa dugay. Sa dihang gibahaan ang ilang lugar, si Nelma nakadawat ug mga sinina nga gidonar sa usa sa iyang mga kustomer. Samtang nangukay sa mga sinina, nakakita siyag kuwarta nga mokantidad ug $1,000 (U.S.) diha sa bulsa sa pipila ka pantalon.

Ang kuwarta nga nakit-an ni Nelma katumbas sa pito ka bulan niyang suweldo, ug gikinahanglan gayod niya kini. Ang iyang balay naguba gumikan sa baha, ug ang iyang amahan ug mga igsoon nawad-an sa halos tanan nilang mga kabtangan. Nianang kantidara, ikapaayo niya ang iyang balay ug matabangan pa gayod niya ang iyang mga paryente. Apan dili itugot sa nabansay-sa-Bibliya nga tanlag ni Nelma nga panag-iyahon ang kuwarta.—Hebreohanon 13:18.

Sayo sa buntag, misulod siya sa trabaho sa dili pa oras nga tingtrabaho ug iyang gikontak ang babayeng negosyante nga maoy nagdonar sa mga sinina. Gipasalamatan ni Nelma ang babaye tungod sa mga sinina apan miingon siya nga dili siya makaako nga panag-iyahon ang kuwarta nga iyang nakit-an diha niana. Ang babaye nalipay kaayo sa pagdawat sa kuwarta. Iya diay kining gigahin aron isuweldo sa iyang mga empleyado. “Talagsa na lang karon ang mga tawong matinud-anon,” miingon ang maong negosyante.

Sa pagkatinuod, ang pipila mobati nga ang pagkamatinud-anon walay ikahatag nga kaayohan. Apan, ang pagkamatinud-anon maoy usa ka hiyas nga gipabilhan pag-ayo niadtong naningkamot sa pagpahimuot sa matuod nga Diyos, si Jehova. (Efeso 4:25, 28) “Di gyod unta ko makatulog ug tarong kon wala pa nako kadto buhata,” matod pa ni Nelma.